Maragul ya kabalwan ing matulid a pamibiebie king arapan ning Dios ban atanggap de ring Kayang talasuyu ing Kayang pamipanuan. Makanini ing sasabian king Biblia:

“Susumpa na la ning Ginu ding pibalebale da ring e mayap a tau, oneng bibendisyunan na la ding pibalebale da ring banal.” (Ding Kasebian 3:33, Ing Mayap a Balita Biblia)

Buri ning Dios a maging matulid tamu ban atanggap taya at ning kekatamung pamilya ing Kayang bendisyun. Nanu pa ing makasadyang gawan ning Dios kareng matulid?

“Lalawan na la at ingatan ning Ginu ding matulid, at pakiramdaman nang karelang saingsing. … Neng mamaus lang taung matulid, pakiramdaman na la ning Ginu, at liligtas king sabla rang problema.” (Ding Dalit 34:15, 17, Ing Mayap a Balita Biblia)

Keng biye pa mung ini, pakinabangan ta ne ing pamanagle keng kaasalan a ini, uli nang lalawen ne ning Ginu ing matulid, pakiramdaman Ne keng pamanaus o pamanalangin, at liligtas Ne kareng panganib.
Ing matulid a talasuyu ning Dios mabibie ya keng kasalpantayanan:

“Dapot ing kanakung banal mie ya king kasalpantayanan: At nung ya mibalik, e tumula kea ing kakung kaladua.” (Heb. 10:38, Ing Biblia)

Ing mabibie king kasalpantayanan mabibie ya king kasalpantayanan nang Cristo (Gal. 2:20). Inya atin yang isipan ning Ginung Jesu-Cristo, ing panga mapamintu king kaburian ning Dios angga king kamatayan (Fil. 2:5, 8, Ing Biblia).

Ing matulid a talasuyu ning Dios atin yang banal a takut king Ginu:

“Itang mabibie king katuliran ing Ginu ya ing keyang katakutan; oneng itang maglinlang ya ing lalapastangan.” (Ding Kasebian 14:2, Ing Biblia)

Ing ating banal a takut king Dios mamako ya king dewakan:

“King pamamilatan na ning kapakaluluan at katutuan misusut ing dewakan; At king pamamilatan na ning takut kang JEHOVA mamaku la ding tau king dewakan.” (Ding Kasebian 16:6)

Gawan tayang patakaran keng keka tamung bie ing panga matulid at panga mapamintu kareng utus ning Dios ban pane tayang adidinan kaligayan ing Dios at ban kanita atanggap taya ing Kayang masaganang pamipanuan.