Balbaleg so pibabali na matunong ya panagbilay ed arap na Dios pian naawat na saray lingkor To so saray panamapalar. Onya so ibabaga na Biblia:

“Say samba na KATAWAN et iiter ed abung na mauges, balet pinapapalar to so pamilya na saray matunong.”  (Kawikaan 3:33 impatalos manlapud New Pilipino Version)

Labay na Dios ya manmatunong tayo pian naawat tayo tan say pamilya tayo so saray panamapalar To. Anto ni so akatarya ya gawaen na Dios ed saray maptek o matunong?

“Say KATAWAN iimanoen to ray matunong, tan dedengelen to ray tawag da; …Saray matunong ontatawag irad KATAWAN, et dedengelen to ra; iyaagel to rad amin a gunigon da.” (Salmo 34:15, 17 Maung a Balita Biblia)

Diya ed sayan bilay ni labat et minabang tila no wala ed sikatayo so sayan talungaring lapud say maptek o matunong et iimanoen na Dios, derengelen To so tawag o pikasi da, tan ililiktar ira ed saray kaatapan. Say lingkor na Dios ya maptek o matunong et manbibilay ed pananisia:

“Ingen say matunong ko manbilay naani lapu ed pananisia: Et no wala naani onsoner, ag onliket so kamarerwak ed sikato.” (Hebreos 10:38 Say Biblia)

Say manbibilay ed pananisia et ibibilay to so pananisia nen Cristo. (Gal. 2:20). Kanyan wala ed sikato so kanunotan nen KATAWAN ya Jesucristo—say panangonor ed linawa na Dios anggad ipapatey. (Filipos 2:5, 8) Say matunong ya aripen na Dios et walay masantos ya takot to ed KATAWAN:

“Sikaton maptek ed kurang to et ontatakot ed KATAWAN, balet say pikewet so dalan to sikatoy ipolisay to.” (Kawikaan 14:2 impatalos manlapud npv)

Say walay masanton takot ed Dios et onaarawi ed kaugsan:

“Lapu ed panangasi tan tua say inkauges sikato so napaandi; et lapu ed takot ed Jehova saray totoo onarawi ra ed mauges.” (Uliran 16:6 sb)

Gawaen tayon naynay ya panuntunan ed bilay tayo so inkamatunong tan inkamaonor ed saray gangan na Dios pian mansiansian naiitdan tayo na dayew so Dios tan pian ontan et nagamuran tayo so daakan Ton panamapalar.