Natural a reaksion ti tao (human instinct) ti dagus a mapan iti natalged a lugar no adda dumteng a peggad. Iti tengnga ti panagsagaba, agbirok isuna ti mapagkamangan. Inton Aldaw ti Panangukom, saan a maliklikan ti tao a sangoen ti kadakkelan a peggad iti biagna, agsipud ta iti daydiay nga aldaw ket ipatungpalto ti Apo ti keddengna iti lubong—mapukawto babaen iti apoy dagiti nadangkes (II Ped. 3:5–7) ken maitapuakto ida iti danaw nga apoy wenno maikadua nga ipapatay nga isu ti naan-anay a supapak ti basol (Apoc. 20:14; Roma 6:23). Isursuro ti Biblia a malaksid ken Apo Jesucristo, amin a tattao ket nagbasol (Roma 5:12; I Ped. 2:21–22), isu a kasapulan ti amin a tattao ti pannakaisalakan inton Aldaw ti Panangukom.

Iti panawen Cristiano, impannayag ti Dios ti ayat ken asina iti tao babaen ti kangrunaan a planona maipapan ti pannakaisalakan—a ti tao ket makikamkameng wenno agmiembro iti Iglesia a bagi ni Cristo:

“Sapay koma ta maikkan isuna ti dayag nga agnanayon iti awan inggana a tiempo gapu iti a kangrunaan a planona ti pannakaisalakan a maipaay iti iglesia babaen ken Jesucristo.” (Efe. 3:21 Naiallison manipud iti The Living Bible)

“Ta ti asawa a lalaki isu ti ulo ti babai, a cas met ni Cristo isu ti ulo ti Iglesia, ket isu met laeng ti Manangisalacan iti bagi.” (Efe. 5:23)

“Ket isu ti ulo ti bagi, cayatna a sao-en, ti Iglesia …” (Col. 1:18)

Ti Iglesia nga isalakan ni Cristo ket ti ginatangna wenno sinubbotna iti darana—ti Iglesia Ni Cristo:

“Kitaenyo ngarud ti bagiyo ken ti amin nga arban a nangikabilan ti Espiritu Santo kadakayo a kas manangaywan, tapno pakanenyo ti iglesia ni Cristo a ginatangna iti darana.” (Aramid 20:28, Naiallison manipud iti Lamsa Translation)

No kasta ngarud, ti Iglesia Ni Cristo ti ayan ti pannakaisalakan. Ditoy a masarakan ti tao ti mapagkamanganna inton aldaw ti pungtot ti Dios agsipud ta daytoy ti isalakanto ni Apo Jesucristo.

Isu a no ti maysa a tao ket nagbalin a kameng wenno miembro ti Iglesia Ni Cristo, rumbeng nga agtalinaed isuna a natibker iti karbenganna, tungpalenna amin a pagrebbenganna, ken salimetmetanna ti kina-Iglesia Ni Cristo-na agingga’t panungpalan.