Ang kinabuhi karon
ug ang kinabuhi nga umaabot
Ang kinabuhi karon
ug ang kinabuhi nga umaabot
La Biblia enseña sobre una sola verdadera Iglesia y cuyo nombre es “Iglesia De Cristo,” que es profetizada, y cree que solamente el Padre es el Dios verdadero
Ni GERSON S. NONATO
Daghang mga tawo ang adunay nagkalain-lain nga atimanon niining kinabuhia. Aduna sa’y nagsulti nga kulang ang adlaw ug oras nga anaa kanila alang sa mga angay nilang asikasuhon. Halos himoon nila nga adlaw ang gabii ug kon mahimo lamang, dili na mupahulay tungod sa ilang pagpanginabuhi, o kaha pag-eskwela ug uban pang mga butang alang niining kinabuhia. Gibuhat nila kini tungod kay nagtuo sila nga mao kini ang maghatag kanila ug maayong kinabuhi.
Dili dautan nga magtinguha ug maningkamot ang tawo nga makabaton ug maayong kahimtang sa kinabuhi niining kalibutana. Apan, ang wala hisayri sa uban, mao ang labaw pang bililhon kaysa niining kinabuhi karon—ang kinabuhi nga umaabot.
Mao nga kon sa unsang paagi nga gi-ampingan sa tawo ang iyang kinabuhi karon ug gipaningkamutan niya nga palambuon kini, labi nga angay niya nga pangandaman ug paningkamutan nga mabatunan mao ang kinabuhi nga umaabot. Unsa ba ang dakong kalainan sa kinabuhi karon ug sa kinabuhi nga umaabot maong labing angay pangandaman ug paningkamutan sa tawo ang kinabuhi nga umaabot?
“Ang kinabuhi sa tawo mubo ug puno sa kasamok. Motubo kini daw bulak nga dali rang malarag, ug unya mahanaw lang daw anino.” (Job 14:1–2 Maayong Balita Biblia)Gihulagway usab sa Bibliya kon nganong puno sa kasamok ug kalisod ang kinabuhi sa tawo dinhi sa kalibutan:
“Kay unsay naangkon sa tawo gikan sa tanan niyang buhat, ug gikan sa pagpakigbisog sa iyang kasingkasing, diin siya nakagbuhat ilalum sa adlaw? Kay ang tanan niyang mga adlaw mga kasub-anan man lamang, ug ang iyang kasakit kagul-anan; oo, bisan pa sa magabii ang iyang kasingkasing dili makapahulay. Kini usab kakawangan man.” (Ecles. 2:22–23 mb)Ug bisan pa man mabatunan sa tawo ang kadungganan, taas nga matang sa edukasyon, ug ang bahandi niining kinabuhi, sumala sa Bibliya ang tanang gihaguan niya—namuhunan man siya gamit ang kaalam ug kahibalo–apan dili niya kini madala sa iyang kamatayon. (Ecles. 2:21; 5:15 mb) Unsa pa ang piho nga masinatian sa tawo unsa man ang iyang kahimtang sa kinabuhi–adunahan man o kabus, nagtungha man siya o wala? Mao kini ang pahayag sa Bibliya:
“Masinati gayod nato ang kinabuhing pait, puno sa kasubo, kabalaka, kasuko ug balatian.” (Ecles. 5:17 mb)Ang mga kalamidad, gubat, panghasi, kagubot, ug kakabos mao ang pipila lamang sa naghatag ug kasubo ug pag-antos sa kinabuhi sa tawo. Nagpabug-at sab sa kinabuhi ang pagkaylap sa kawalay-hustisya sa kalibutan:
“Unya giusisa ko na usab ang tanang pagpanlupig dinhi sa kalibotan. Naghilak ang mga gilupigan apan walay mitabang kanila kay gamhanan man ang mga nanglupig.” (Ecles. 4:1 mb)Kung ang mga nahisgutan naghulagway sa kinabuhi karon, unsa ba diay ang dakong kalainan sa kinabuhi nga umaabot nga angay paningkamutan nga mabatunan sa tawo?
“Kay, ania karon, ako nagahimo ug bag-ong mga langit ug usa ka bag-ong yuta; ug ang unang butang dili na pagahinumduman, ni motungha pa sa hunahuna.” (Isa. 65:17 Ang Biblia-Cebuano)Ang bag-ong langit ug bag-ong yuta gitawag nga “Balaang Siyudad”:
“Unya nakita ko ang usa ka bag-ong langit ug bag-ong yuta kay nahanaw na man ang unang langit ug ang unang yuta ingon man ang dagat. Nakita ko usab nga mikunsad gikan sa langit ang Balaang Siyudad, ang bag-ong Jerusalem nga gikan sa Dios nga sama sa kaslonong babaye nga andam na sa pagsugat sa iyang pamanhonon. Ug nadungog ko ang usa ka kusog nga tingog nga nagsulti gikan sa trono, “Karon ang puloy-anan sa Dios ania na sa katawhan. Magpuyo na siya tipon kanila ug sila mahimong iyang katawhan. Ang Dios makig-uban kanila ug siya mahimo nga ilang Dios. Pahiran niya ang ilang luha ug wala nay kamatayon o kasubo, paghilak o kasakit kay nahanaw na man ang daang mga butang.” (Pinadayag 21:1–4 mb)Dako gayod ang kalainan sa kinabuhi didto sa Balaang Siyudad kumpara sa kinabuhi sa tawo karon. Kon ang kinabuhi dinhi sa kalibutan tugob sa kalisdanan ug kagul-anan, didto sa Balaang Siyudad dili na masinatian ang kalisdanan ug kasubo. Mubo ug adunay kinutoban ang kinabuhi sa tawo karon apan sa Balaang Siyudad wala nay kamatayon tungod kay mabatunan sa tawo ang kinabuhi nga walay katapusan. (Tito 1:2 mb). Kon dinhi sa kalibutan gihikaw sa tawo ang hustisya, apan didto sa Balaang Siyudad maghari ang katarong (II Ped. 3:13 mb) Walay bisan kinsa man nga anaa sa husto nga panghunahuna nga mobalibad sa kinabuhi nga walay kalisdanan, balatian, ug kamatayon—ang kinabuhi nga umaabot mabatonan sa Balaang Siyudad o sa gingharian sa Dios. Apan makalaum kaha ang tanang tawo niana? Sa unsang paagi mapiho sa tawo nga makauban siya sa mga adunay paglaom alang sa kinabuhi nga umaabot?
Gipiho sa Biblia nga ang manunod sa gingharian sa Dios mao ang mga tawo nga gibalhin Niya sa gingharian sa iyang hinigugmang Anak o ni Cristo. Sila mao ang gipasaylo sa sala tungod kay gihinloan o gitubos sa dugo sa Ginoong Jesucristo (Col. 1:12–14). Mao nga bililhon nga mapiho sa tawo nga siya kauban sa gitubos sa dugo ni Cristo—mga makauban Niya ug sa Diyos ngadto sa Balaang Siyudad ug matagamtaman ang kinabuhi nga umaabot. Sumala sa Bibliya, anaa sa Iglesia Ni Cristo ang mga gitubos ni Cristo pinaagi sa Iyang dugo (Buhat 20:28 Lamsa Translation).
Sa Adlaw sa Paghukom, ang mga gitubos sa dugo ni Cristo o ang mga miembro sa Iglesia Ni Cristo ang gipiho sa Bibliya nga “dili na gutomon, ug…dili na uhawon hangtod sa hangtod didto sa Balaang Siyudad.” Ug “dili na nila masinatian ang kainit sa adlaw[muhampak; mo-igo] kanila, ug walay [makapaso] nga kainit nga makasunog kanila, tungod kay ang Cordero nga anaa sa gitaliwad-an sa trono mamahimong ilang pastor.” Sumala sa Bibliya, “pagapahiran sa Dios ang tanang luha sa ilang mga mata” (Pinadayag 7:13–17 Expanded Bible, gihubad gikan sa Ingles).
Mao nga dili anugon alang sa mga miembro sa Iglesia Ni Cristo nga unahon ang ilang pagka-Iglesia Ni Cristo kon itandi sa bisan unsa man nga butang niining kinabuhia. Dili sila mahimong alkansi kon maghago sila alang sa pag-alagad sa Dios sa sulod sa matuod nga Iglesia tungod kay gilauman nila ang gisaad Niya nga kinabuhi nga umaabot.