Ang kabuhi subong
kag ang kabuhi sa palaabuton
Ang kabuhi subong
kag ang kabuhi sa palaabuton
La Biblia enseña sobre una sola verdadera Iglesia y cuyo nombre es “Iglesia De Cristo,” que es profetizada, y cree que solamente el Padre es el Dios verdadero
Ni GERSON S. NONATO
MADAMU SANG MGA TAWO ANG MASAKO GID nahanungod sa mga buluhaton para sa kabuhi nga ini. May mga nagasiling nga kulang gid ang mga oras kag mga adlaw sa kadamuon sang mga buluhaton nga dapat nila atubangon. Halos ginahimo na nga oras pa gihapon sang pagtrabaho ang kagab-ihon kag halos wala na nagapahuway sa pagpangabuhi, pag-eskwela, kag iban pa nga mga butang nga para sa kabuhi nga ini. Ginahimo nila ini sa pagpati nga ini ang makahatag sa ila sang maayo nga pagpangabuhi.
Indi malain nga maghandum kag magtinguha ang tawo nga mangin maayo ang iya kahimtangan sa pagpangabuhi sa kalibutan nga ini. Apang, ang wala mahibaluan sang iban nga may labi pa nga importante sa kabuhi nga ini—ang kabuhi sa palaabuton.
Gani, kun paano nga ginahalungan sang tawo ang iya kabuhi nga ini subong kag ginatinguhaan nga mangin maayo ini, labi nga dapat pagahandaan kag tinguhaon niya nga maangkon ang kabuhi sa palaabuton. Ano bala ang daku nga kinatuhay sang kabuhi subong kag sa kabuhi sa palaabuton, gani, labing importante nga pagahandaan kag tinguhaon sang tawo nga maangkon ang kabuhi sa palaabuton?
“Ang kabuhi sang tanan nga mga tawo malip-ot kag magamo. Madali sila magtubo kag madali malaya subong sang mga bulak, Nagakawala sila subong sang isa ka landong.” (Job 14:1–2 Maayong Balita Biblia)Ginlaragway man sang Biblia kun ngaa puno sang kagamo ang kabuhi sang tawo sa kalibutan:
Nagapangabudlay ka kag nagapalibog sa bug-os mo nga pagkabuhi, kag ano bala ang nakuha mo? Ang tanan mo nga ginahimo, sa bug-os mo nga pagkabuhi, wala sing iban nga ginadala kundi palaligban kag kasakit sa tagipusoon. Indi gani makapahuway ang imo panghunahona sa kagab-ihon. Ini tanan wala sing kapuslanan. (Manugwali 2:22–23 mb)Kag bisan pa makaangkon ang tawo sang kadungganan, mataas nga tinun-an, kag manggad sa kabuhi nga ini, nga suno sa Biblia, ginapangabudlayan tanan ini sang tawo—ginagamitan man niya ini sang kaalam kag ihibalo—apang indi niya ini madala sa iya kamatayon (Manugwali 2:21 mb; 5:15 mb). Ano pa ang pat-od nga maagyan sang tawo anoman ang estado niya sa kabuhi—manggaranon ukon pigado, may ineskwelahan ukon wala? Amo sini ang paathag sang Biblia:
“Ang makuha naton amo ang pagkabuhi sa kadudolman kag kasubo, nga nagapalibog, nagakaakig kag nagamasakit.” (Manugwali 5:17 mb)Ang kalamidad, giyera, kasingki, kagamo, kag kapigaduhon ang pila sa mga nagatuga sang palaligban kag kasubo sa kabuhi sang tawo. Ang nagapabug-at pa sa pagpangabuhi subong sa kalibutan amo ang pagpamigos ukon ang di-pagkamatarong:
“Sa liwat gintan-aw ko ang tanan nga di-pagkamatarong nga nagapadayon sa sini nga kalibutan. Ang mga ginapigos nagahinibi, kag wala sing may magabulig sa ila. Wala sing may magabulig sa ila, kay ang ila mga manugpigos may gahom nga ginasaligan.” (Manugwali 4:1 mb)Kun ang laragway sang kabuhi subong sa kalibutan amo ang kaangay sang ginsitas, ano naman ang dako nga kinatuhay sang kabuhi nga magaabot nga ina ang dapat nga pagahandumon sang tawo?
“Kay tan-awa! Nagatuga ako sing bag-o nga langit kag bag-o nga duta; Kag ang nagligad nga mga butang indi na pagdumdumon,Ukon magpabilin sa tagipusuon.” (Isa. 65:17 Bag-ong Kalibutan nga Badbad 2014 nga Edisyon)Ang bag-ong langit kag bag-ong duta amo ang ginatawag nga “Banwang Balaan”:
‘“Niyan nakita ko ang bag-ong langit kag ang bag-ong duta; kay ang nahaunang langit kag ang nahaunang duta nagtaliwan, kag wala na ang dagat. Kag nakita ko ang banwang balaan, ang bag-ong Jerusalem, nga nagapanaug halin sa langit gikan sa Dios, nga naaman subong sang nobya nga napunihan nga sa iya bana; kag nabatian ko ang mabaskug nga tingug gikan sa trono nga nagasiling, “Yari karon, ang kayangkayang sang Dios upud sa mga tawo. Magapuyo sia kaupud nila, kag sila mangin-iya katawohan, kag ang Dios gid magaupud sa ila; pahiran niya ang tagsa ka luha sa mga mata nila, kag wala na sing kamatayon, ukon kalisud ukon paghibi ukon kasakit pa, kay ang nahaunang mga butang nagtaliwan.”’ (Bugna 21:1–4 Ang Biblia – Hiligaynon)Ang kabuhi didto sa Banwang Balaan may dako nga kinatuhay sa sari sang kabuhi sang tawo subong. Kun ang kabuhi diri sa kalibutan puno sang kabudlayan kag palaligban, apang didto sa Banwang Balaan wala na sang kabudlayan kag kalisud ukon kasakit. Malip-ot kag may katapusan ang kabuhi sang tawo subong apang sa Banwang Balaan wala na sang kamatayon bangud maangkon niya didto ang kabuhi nga walay katapusan (Tito 1:2 mb). Kun diri sa kalibutan may ara sang indi nakabaton sang pagkamatarong, apang sa Banwang Balaan nagaluntad ang pagkamatarong (II Ped. 3:13 mb). Wala sang bisan sin-o nga yara sa husto nga paminsaron nga magapang-indi sa sari sang kabuhi nga wala sang kabudlayan, sakit, kag kamatayon—ang kabuhi sa palaabuton nga maangkon sa Banwang Balaan ukon sa ginharian sang Dios. Apang tanan bala nga mga tawo makalaom sina? Paano bala mapat-od sang tawo nga makaupod siya sa mga may paglaom sa kabuhi nga palaabuton?
Ang ginapat-od sang Biblia nga maga-ambit sang ginharian sang Dios amo ang mga tawo nga gindala Niya sa ginharian sang Iya Anak ukon ni Cristo. Sila ang mga ginpatawad sa kasal-anan bangud gintinluan ukon gintubos sang dugo sang Ginoong Jesu-Cristo (Col. 1:12–14 mb). Gani importante nga mapat-od sang tawo nga nakaupod siya sa mga gintubos sang dugo ni Cristo—ang mga makaupod Niya kag sang Dios sa Banwang Balaan kag makaangkon sang kabuhi sa palaabuton. Ang duog kun sa diin yara ang mga gintubos sang dugo ni Cristo, suno sa Biblia, amo ang Iglesia Ni Cristo (Binuhatan 20:28 Lamsa Translation).
Sa Adlaw sang Paghukom, ang gintubos sang dugo ni Cristo ukon ang mga katapo sa Iglesia Ni Cristo ang ginpat-od sang Biblia nga “indi na gid sila paggutumon, kag paga-uhawon,” didto sa Banwang Balaan. Kag “ang adlaw indi na gid makahalit [magaigo;magahampak] sa ila, kag wala sang [makapaso] nga init ang magasunog sa ila, bangud ang Cordero nga yara sa tunga sang trono amo ang maga-pastol sa ila.” Suno pa sa Biblia, “pagapahiran sang Dios ang kada luha sa ila mga mata” (Bugna 7:13–17 Expanded Bible, ginbadbad sa Hiligaynon).
Gani indi nagakahanugon ang mga katapo sang Iglesia Ni Cristo nga ginaprayoridad ang ila pagka-Iglesia Ni Cristo kaysa sa anoman nga mga butang sa kabuhi nga ini. Indi kapiyerdihan para sa ila ang pagpanikasog sa pag-alagad sa Dios sa sulod sang matuod nga Iglesia bangud ginalauman nila ang saad sang Dios nga kabuhi sa palaabuton.