Say bilay natan
tan say bilay ya onsabi
Say bilay natan
tan say bilay ya onsabi
La Biblia enseña sobre una sola verdadera Iglesia y cuyo nombre es “Iglesia De Cristo,” que es profetizada, y cree que solamente el Padre es el Dios verdadero
Nen GERSON S. NONATO
DAKEL SO MASYADON ABALA ed saray obligasyon ed sayan bilay. Wala iray mangibabaga ya kulang ni so oras tan agew da ed karakel na nepeg dan asikasuen. Ed arom, gagawaen da lan agew so labi tan ngal-ngali ag la manpapainawa lapud panag-anap bilay, panag-aral, tan diad arom ni iran bengat la ya para ed sayan bilay. Gagawaen da ya ed pananisia ya saya so mangiter ed sikara na maong ya bilay.
Aliwan mauges ya manpirawat tan mansikap so too ya manmaliw ya maong so kipapasen na bilay to ed sayan mundo. Bangbalet, say aga anta na arom et wala ni so mas mabli nen say bilay natan—say bilay ya onsabi.
Kanyan no panon ya aalwaran na too so bilay to natan tan pansisikapan to ya aya et paaligwasen, lalo ton nepeg ya pantaryaan tan sikapen ya nagamoran so samay onsabin bilay. Anto ta so baleg ya nandumaan na bilay natan tan bilay ya onsabi kanyan nepeg labat ya mas pantaryaan tan pansikapan ya nagamoran na too so bilay ya onsabi?
Ibabaga na Biblia no anton uri na bilay so wala ed too natan:
“Say bilay na too et antikey tan napno na irap, namamagaan ya singa dika, ombubuskag ya singa rosas, Naandipat ya singa bula, singa aninon nababalang.” (Job 14:1–2 Impatalos ed Pangasinan manlapud Magandang Balita Biblia)
Impanengneng met na Biblia no akin et napno na irap so bilay na too ed mundo:
“Antokaman so gawaen na too et mangiiter na kaapaan tan sakit na liknaan. Antokaman ya gawaen na too et mangiiter ed sikato na paga tan sentimyento. Wala ni iray labi ya sikato et aga makaugip ed pannononot. Aya met et anggapuy kakanaan” (Ecles. 2:22–23 Impatalos ed Pangasinan manlapud mb)
Tan anggano akagamor ni so too na dayew, na atagey ya kakabatan, tan na kayamanan ed sayan bilay, onong ed Biblia say amin ya nansagputan to – amuunanan to man ya na kakabatan tan karunungan – et agto ya naawit diad ipatey to (Ecles. 2:21 mb; 5:15 mb).
Anto ni so sigurado ya sagmaken na too anto man so estado to ed bilay – mayaman o mairap, nanaral o andi? Onya so bitla na Biblia:
“likod ed saya, say bilay tayo et lanang ya walay alinlangan; napno na gunigon, ermen, sakit tan kaapaan” (Ecles. 5:17 Impatalos ed Pangasinan manlapud mb)
Say kalamidad, giyera, kaatapan, gulo tan kairapan et pigara labat ed saray mangiiter na paga tan ermen ed bilay na too. Manpapabelat ni ed panangawit na bilay natan ed mundo so kaandian na hustisya:
“Anengneng ko ya anggapu so hustisya ed mundo. Saray nalalames et manakakis balet anggapuy timmulong ed sikara lapud makapanyari so mamapairap ed sikara” (Ecles. 4:1 Impatalos ed Pangasinan manlapud mb)
No sarayan abitla et sikato so lupa na bilay natan, anto balet so baleg ya kidumaan na bilay ya onsabi ya sikato so nepeg ya panpirawatan na too?
Say bilay ya onsabi et say bilay ed “balon tawen tan balon dalin” ya insipan na Diyos. Diman, aray bengat ya unaan et linmabas la:
“Wadya, manggawaak na balon tawen tan balon dalin. Agla nanonotan so saray onaan ya bagay, ni untariwa ni ed isipan.” (Isa. 65:17 Impatalos ed Pangasinan manlapu ed New Pilipino Version)
Say balon tawen tan balon dalin et say tatawagen ya “Masanton Ciudad”:
“Tan anengneng ko so sakey a balon tawen tan sakey a balon dalin, lapud say onaan ya tawen tan onaan ya dalin et abalang la, tan anggapo met la so dayat. Anengneng ko so Masanton Ciudad, say balon Jerusalem, unleleksab manlapud tawen, manlapud Dios, akawesan ya maong a singa biin akataryan ikasal ed asawaen to. Tan manlapud trono et nadngel ko so sakey ya baleg a voces ya mangibabaga, ‘Natan say ayaman na Dios et wala la ed totoo, et sikato’y nakaiba da. Sikara so manmaliw ya baley to, tan say Dios mismo so nakaulop da tan sikato so manmaliw a Dios da. Punasen to so balang lua ed saray mata da. Naandi la so ipapatey, say dageyem, say panlua tan say ot-ot tan sakit, lapud linmabas la irayan bengat la.’” (Apoc. 21:1–4 Impatalos ed Pangasinan manlapud npv)
Say bilay diman ed Masanton Ciudad et niduma-duma ed bilay na too natan. No say bilay dia ed mundo et napno na irap tan kaermenan, diman ed Masanton Ciudad et anggapo lay kaermenan o dageyem. Antikey tan walay angga so bilay na too natan balet dia ed Masanton Ciudad et anggapo lay ipapatey lapud say taroken to et say bilay ya andi anggaan (Tito 1:2 mb).
No dia ed mundo et wala iray nasisibletan na hustisya, say Masanton Ciudad balet et panaarian na hustisya (II Ped. 3:13 mb).
Anggapo’y siopaman ya walad maptek ya kanonotan so aga magabay ed bilay ya anggapo lay irap, gunigon, tan patey – say onsabin bilay ya awaten ed Masanton Ciudad o panarian na Dios. Balet amin kasi ya too et makailalo ed saya? Panon ya napiho na too ya sikato et kaiba ed saray walay ilalo ed bilay ya onsabi?
Say piniho na Biblia ya mantawir na panarian na Dios et saray totoon inyalis to ed panarian na anak To o nen Cristo. Sikara so apirdona la ed kasalanan lapud nilinis o dinondon na dala na Katawan ya Jesucristo (Col. 1:12–14). Kanyan mabli ya napiho na too ya sikato et kabilang ed saray dinondon na dala nen Cristo—saray nakaiba To tan say Dios ed Masanton Ciudad tan mangawat na bilay ya onsabi. Say kulaan na saray dinondon nen Cristo, onong ed Biblia, et say Iglesia Nen Cristo (Gawa 20:28 Lamsa Translation).
Diad Agew na Panangukom, say dinondon na dala nen Cristo o saray miembro na Iglesia Nen Cristo so sinigurado na Biblia ya “ag la kapigan man naerasan, tan … ag la kapigan man naapgaan diman ed Masanton Ciudad.” Tan “say agew et ag la makaderal [ontama; unbasig} ed sikara, tan anggapoy [makasinit] ya petang so mamool ed sikara, lapud say Cordero ya wala ed pegley na trono so manmaliw ya pastol da.” Onong ni ed Biblia, “punasen na Dios so balang lua ed saray mata da” (Apoc. 7:13–17 Expanded Bible, inpatalos manlapud Ingles).
Kanyan aga kapigan man panhihinayangan na saray miembro na Iglesia Nen Cristo ya iyuna so inka-Iglesia Nen Cristo kasalat na saray antokaman ya bengat la ed sayan bilay. Aliwan kalugian para ed sikara so saray sakripisyo alang-alang ed panaglingkor ed Dios diad loob na tuan Iglesia lapud iilaloan da so sipan ya bilay ya onsabi.