Igwa nin dakulang maitatabang satuya an manlaen-len na kaaraman na nanonodan niyato sa iskwelahan asin sa paagi kan pansadiring pag-aadal. Alagad kun ginamit niyato an mga ini nin tama mauswag kita asin maasenso sa satuyang mga piggigibo. Kun sering, maghingowa kita na madogangan pa asin maghararum pa an satuyang kaaraman tanganing mas dakula pa na mga pag-uswag an satuyang makua, arug kan pigsasabi nin Banal na Kasuratan:

“An naghihingowang magin madonong, namomoot sa saiyang sadiri; an nagpapahalaga sa saiyang nanodan, magigin mauswag.” (Mga Talinghaga 19:8 Marahay Na Bareta Biblia)

Makakatabang an pagbasa nin angay na mga libro asin paghinanyog sa mga itinutukdo nin mga  tawong may igo asin tamang kaaraman sa satong ginigibo.

Urog sa gabos, kaipuhan niyato an pag-iba nin Kagurangnan na Diyos tanganing kita maguswag:

“Kun kaiba nyato an Dios, kita manggagana; siya an maronot kan mga kaiwal ta.” (Salmo 60:12 Marahay na Bareta Biblia)

Kun pa’no makaibahan an Diyos sa satuyang buhay, ini an ginibo kan Saiyang enot na mga sorogoon:

“Nagin maimbod siya sa Kagurangnan asin dai nagsuhay saiya. Kinuyog niya an mga pagboot na itinao nin Kagurangnan ki Moises. Kaya inibahan siya nin Kagurangnan asin nag-uswag siya sa gabos niyang gibo. … (II Hade 18:6–7 Marahay na Bareta Biblia)

Naeksperyensiyahan ni Hadeng Ezekias an pakikisumaro kan Kagurangnan Dios por dahil ta; “Kinuyog niya an mga pagboot na itinao nin Kagurangnan.” Iyo ini an patotoo kan Kagurangnan na si Jesukristo kun tano ta kaiba niya an Ama na nagsugo saiya:

“Kaiba ko an nagsugo sako; dai niya ako pinapabayaan; huli ta danay na ginigibo ko an ikinakaogma niya.” (Juan 8:29 Marahay na Bareta Biblia)

Kun sering, masesierto niyato an pag-iba nin Diyos kun danay na isasagibo asin susunudon niyato an mga nakakaugma Saiya.

Kabubotan nin Diyos na “an gabos makaligtas, saka makamidbid kan katotoohan” (I Tim. 2:3–4 ipigliwat hale sa Magandang Balita Biblia). Tanganing mangyari an kabubotan Niya na ine, ipigtukdo nin Kagurangnan na si Jesucristo an saro sa mga katotoohan na kaipuhan magdanay sa tawo sa ikauugma kan Kaguranggan niyatong Diyos asin mahatod sa tawon nin kaligtasan:

“Kaya nagsabi giraray sainda si Jesus, ‘Sa katotoohan sinasabihan ko kamo, ako an pintoan na inaagihan kan mga karnero. … Ako an pintoan; an siisay man na minalaog sa sabsabon na minaagi sako, makakaligtas; …’” (Juan 10:7 at 9 Revised English Bible, ipigliwat hale sa Ingles)

An sabsaban na kaipuhan laogan  mayong iba eyu an Iglesia Ni Cristo (Mga Gibo 20:28 Lamsa Translation, ipigliwat hale sa Ingles). Entonces sa panahon na ine, ang pakikisumaro nin Kagurangnan Diyos makukua kan tawo kun siya miyembro kan totoong Iglesia Ni Cristo. Alagad bakung miyembro sana’, An kaipuhan iyo an dai paglihis sa pagkuyog sa Dios asin danay na piggigibo an mga nakakaugma Saiya.

Magmawot asin hingohahon niyato na makua an danay na pag-iba nin Kagurangnan Diyos. Tanganing mautob iyan kaipuhan niyato na patunayan an satuyang pagkamaoot Saiya sa paagi nin udok sa buot na pagsasagibo kan Saiyang mga kasuguan/togon ( I Juan 5:3), kaibahan an paglaog sa Iglesia Ni Cristo.