Adunay dakong ikatabang kanato ang lainlaing kahibalo nga nakat-unan sa tunghaan ug pinaagi sa kaugalingong pagtuon. Kung maoy gamiton nato nga husto, mouswag ug magadaug kita sa atong mga pagbuhat. Busa, maningkamot kita nga madugangan pa ug modako o molalum ang atong mga kahibalo aron dugang pagdaug pa ang atong mabatunan, sama sa pahayag sa Balaan nga Kasulatan:

“Tabangi ang imong kaugalingon ug pagtuon kutob sa imong maabot; unya hinumdomi ang imong nakat-onan ug magmalamposon ka.” (Panultihon 19:8 Maayong Balita Biblia, 1981)

Makatabang ang pagbasa sa mga haum nga basahon ug ang pagpaminaw sa gitudlo sa mga tawong adunay igo ug hustong kahibalo sa atong buhaton.

Labaw sa tanan, kinahanglan nato ang pakig-uban sa Dios aron kita magdaug:

“Modaog kami kay ang Dios dapig man kanamo; buntogon niya ang among mga kaaway.” (Salmo 60:12 Maayong Balita Biblia, 1981)

Kung sa unsang paagi maka-uban ang Dios sa atong kinabuhi, ingon niini ang gibuhat sa mga nahiunang alagad Niya:

“Siya misalig sa GINOO; wala siya mobiya sa pagsunod kaniya kondili nagtuman sa iyang mga sugo nga gisugo sa GINOO kang Moises. Ug ang GINOO nag-uban kaniya ug bisan asa siya moadto, siya nagmauswagon …” (II Hari 18:5–7 Ang Biblia, 2011–ABCEB)

Nasinatian ni Haring Ezechias ang pakig-uban sa Ginoong Dios tungod kay “wala siya mobiya sa pagsunod kaniya kondili nagtuman sa iyang mga sugo nga gisugo sa Ginoo.” Kini usab ang pagpamatuod sa Ginoong Jesucristo kung nganong kauban Niya ang Amahan nga nagsugo Kaniya:

“Ug siya nga nagpadala kanako nag-uban kanako; wala ako niya pasagdi nga mag-inusara, kay nagbuhat man ako kanunay sa makapahimuot kaniya.” (Juan 8:29 Maayong Balita Biblia, 1981)

Kung mao, mapiho nato ang pakig-uban sa Dios kung kita mosunod Kaniya ug buhaton ang makapahimuot Kaniya.

Kabubut-on sa Dios nga “maluwas ang tanang tawo ug mahibalo sa kamatuoran” (I Tim. 2:3–4 MB). Aron matuman kining maong kabubut-on Niya, gitudlo sa Ginoong Jesucristo ang usa sa mga kamatuoran nga angay matuman sa tawo aron makapahimuot sa Ginoong Dios ug magdalit sa tawo og kaluwasan:

“Busa si Jesus misulti pag-usab: “Sa pagkatinuod gayod magaingon ako kaninyo, Ako mao ang pultahan sa panon sa mga karnero. …  Ako mao ang pultahan; bisan kinsang tawo nga musulod sa panon pinaagi kanako, siya maluwas …” (Juan 10:7 at 9 Revised English Bible, gihubad gikan sa Ingles)

Ang panon nga gihisgutan nga angay pagasudlan o pasakupan walay lain kondili ang Iglesia Ni Cristo (Buhat 20:28 Lamsa Translation, gihubad gikan sa Ingles). Busa niining maong panahon, ang pakig-uban sa Ginoong Dios mabatonan sa tawo kung siya miyembro sa matuod nga Iglesia Ni Cristo. Apan dili basta nga miyembro lang kondili kinahanglan nga dili mobiya sa pagsunod sa Dios ug kanunay nga buhaton ang makapahimuot Kaniya.

Tinguhaon ug paningkamutan natong mabatonan ang kanunayng pakig-uban sa Ginoong Dios. Aron kini matuman kinahanglan natong bug-os nga mapamatud-an ang atong paghigugma Kaniya pinaagi sa tibook kasingkasing nga pagsunod sa Iyang mga sugo (I Juan 5:3), kauban ang pagsulod sa Iglesia Ni Cristo.