May daku gid nga maibulig sa aton ang nanuhaytuhay nga kaalam nga aton natun-an sa eskuwelahan kag pinaagi man sang aton kaugalingon nga pagtuon. Kun gamiton naton ini sang husto, magauswag kita kag magamadinalag-on sa aton mga hilikuton. Gani, tinguhaon naton nga dugangan pa kag pasangkaron ukon padalumon ang aton kaalam agod maangkon pa naton ang mas daku nga kadalag-an kag pag-uswag, subong sang ginasiling sang Balaan nga Kasulatan:

“Ang tawo nga nagatinguha nga magmaalamon nagakabalaka sa iya kaugalingon, kag ini nga tawo magauswag.” (Hulubaton 19:8 Ang Pulong sang Dios)

Makabulig ang pagbasa sang nagakaigo nga mga libro kag ang pagpamati sa ginatudlo sang mga tawo nga may ikasarang kag insakto nga kaalam sa kun ano ang aton ginahimo.

Labaw sa tanan, kinahanglan naton ang pagdampig ukon ang pag-upod sang Dios agod magmadinalag-on kita:

“Kon ang Dios magdampig sa amon magadaog kami, lutoson niya ang amon mga kaaway.” (Salmo 60:12 Maayong Balita nga Biblia-Hiligaynon)

Kun paano naton makaupod ang Dios sa aton kabuhi, amo ini ang ginhimo sang nauna Niya nga mga alagad:

“Si Ezequias nagsalig sa GINOO, ang Dios sang Israel. … Nagmatutom sia sa GINOO, kag wala gid magbiya sa iya, gintuman niya ang tanan nga mga sugo nga ginhatag sang GINOO kay Moises. Gani ang GINOO nag-upod sa iya, kag nagmainuswagon sia sa tanan nga iya ginhimo. …” (II Hari 18:5–7 mbbhil12)

Naeksperyensiyahan ni Hari Ezequias ang pagpakig-upod sang Ginoong Dios bangud, “… wala gid [sia] magbiya sa iya; gintuman niya ang tanan nga mga sugo nga ginhatag sang Ginoo …” Ini man ang pamatuod sang Ginoong Jesu-Cristo kun ngaa kaupod Niya ang Amay nga nagsugo sa Iya:

“Kag ang nagpadala sa akon nagaupod sa akon. Wala niya ako ginapabay-i, kay ginahimo ko sa gihapon ang iya nahamut-an.” (Juan 8:29 mbbhil12)

Kon amo, makasigurado kita sa pagpakig-upod sang Dios kun magsunod kita sa Iya kag himuon ang makahamuot sa Iya.

Kabubut-on sang Dios nga “… ang tanan nga mga tawo maluwas kag makadangat sa paghibalo sang kamatuoran” (I Timoteo 2:3–4 mbbhil12). Agod matuman ang Iya kabubut-on, gintudlo sang Ginoong Jesu-Cristo ang isa sa mga kamatuoran nga dapat tumanon sang tawo agod mahamuot ang Ginoong Dios kag magadala sa tawo sa kaluwasan:

“Gani si Jesus nagsiling liwat: sa pagkamatuod nagasiling ako sa inyo, ako ang ganhaan sang panong sang mga karnero. … Ako ang ganhaan; ang bisan sin-o nga magsulod sa panong pinaagi sa akon maluwas siya. …” (Juan 10:7 kag 9 Revised English Bible, ginbadbad halin sa Ingles)

Ang panong nga ginatudlo nga dapat sudlan ukon dapat mangin miyembro ang tawo, wala sang iban kundi ang Iglesia Ni Cristo (Binuhatan 20:28, Lamsa Translation, ginbadbad halin sa Ingles). Gani sa panahon subong, ang pagpakig-upod sang Ginoong Dios maangkon sang tawo kon siya katapo sang matuod nga Iglesia Ni Cristo. Apang indi lang basta miyembro kundi kinahanglan nga indi magbulag sa pagsunod sa Dios kag pirme nagahimo sang makapahamuot sa Iya.

Handumon kag tinguhaon naton nga maangkon ang padayon nga pagpakig-upod sang Ginoong Dios. Para matabo ina, dapat naton mapamatud-an sang bug-os ang aton paghigugma sa Iya paagi sa bug-os tagipusuon nga pagtuman sang Iya mga sugo (I Juan 5:3 mbbhil12), kaupod ang pagsulod sa Iglesia Ni Cristo.