An buhay ngunyan asin
an buhay na madatong
An buhay ngunyan asin
an buhay na madatong
La Biblia enseña sobre una sola verdadera Iglesia y cuyo nombre es “Iglesia De Cristo,” que es profetizada, y cree que solamente el Padre es el Dios verdadero
Ni GERSON S. NONATO
DAKOL AN SIBOTSIBOT NA MARAY sa mga kahaditan sa buhay na ini. Igwang mga tawong nagsasabi na kulang pa an saindang oras sagkod aldaw sa kadakolan nin kaipuhan nindang gibohon. Ginigibo nindang aldaw an banggi asin haros dai na nagpapahingalo huli sa paghanap nin ikabubuhay, pag-aadal, asin iba pang mga bagay na manungod sa buhay na ini. Ginigibo ninda ini sa pagtubod na matao ini sainda nin marahay na buhay.
Bakong maraot na an sarong tawo magmawot asin magmaigot na magin mas marahay an kamugtakan kan saiyang buhay sa kinaban na ini. Alagad, an dai aram kan iba na igwa nin mas importante sa buhay na ini ngonyan—an buhay na maabot.
Asin huling pinoprotektaran nin tawo an saiyang buhay ngonyan asin nagmamaigot na paoswagon iyan, urog na kaipuhan siyang magandam asin maghingowa na maresibe an buhay na maabot. Ano an dakulang pagkakaiba kan buhay ngonyan asin kan buhay na maabot kun kaya urog na kaipuhan na magandam asin maghingowa an tawo na maresibe an buhay na maabot?
“Gabos kita namundag na maluya asin makaheherak; halipot an mga aldaw kan satong buhay, asin pano nin kasakitan. Minatalubo kita siring sa sarong burak, dangan naaalang tolos; nawawara kita siring sa mga anino.” (Job 14:1–2 Marahay na Bareta Biblia)Iniladawan man kan Biblia kun tano ta panopano nin sakit an buhay nin tawo digdi sa kinaban:
“Ano an makukua nin tawo sa pagtrabaho asin pagpagal sa kinaban? Huli ta an gabos niyang aldaw pano nin kasakitan, asin kulog nin boot; maski sa banggi daing pahingalo an saiyang isip. Ini mayo man nin halaga.” (Parahulit 2:22–23 mbb)Asin dawa makua nin tawo an onra, nin halangkaw na pinag-adalan, asin kayamanan sa buhay na ini, segun sa Bibliya, an gabos na pinagsakitan—dawa kun ini piggagmitan niya nin kaaraman asin kadunungan— dai niya madadara kun siya magadan (Parahulit 2:21; 5:15 mbb). Ano pa an seguradong mamamatian nin tawo dawa ano an saiyang kamugtakan sa buhay—mayaman o pobre, nakapag-adal o dai? Arug kaini an deklarasyon kan Biblia:
“An bilog niyang aldaw ipinapamuhay niya sa kadikloman, sa kamondoan, sa kahandalan, sa kaanggotan, asin sa kahelangan.” (Parahulit 5:17 mbb)An kalamidad, giyera, kadahasan, kariribokan, asin kasakitan an nagkapira sana sa nagigin dahelan nin kahaditan asin kamunduan sa buhay nin tawo. Nagpapagabat pa sa pagdadara nin buhay ngonyan sa kinaban an kawaran nin hustisya:
“Dangan hiniling ko giraray an gabos na inhustisya na ginigibo sa kinaban. Nagtatangis an mga inaapi asin mayo nin minaranga sainda, huli ta an mga nag-api sainda iyo an igwa nin kapangyarihan.” (Parahulit 4:1 mbb)Kun an mga nahunambitan iyo an ladawan kan buhay ngonyan, ano an dakulang pagkakaiba kaini asin kan buhay na maabot, na kaipohan pagmawoton kan tawo?
An buhay na maabot iyo an buhay sa “bagong kalangitan asin bagong daga” na ipinanuga nin Dios. Duman an mga naenot na bagay nakalihis na:
“Nagsasabi an Kagurangnan, ‘Naglalalang ako nin bagong kinaban asin bagong kalangitan. An mga pangyayari kan nakaaging panahon dai na gigiromdomon.’” (Isa. 65:17 mbb)
An bagong langit asin an bagong daga iyo an inaapod na “Banal na Syudad”:
“Dangan nahiling ko an sarong bagong langit asin an sarong bagong daga. An enot na langit saka an enot na daga napara, siring man an dagat. Nahiling ko man an Banal na Syudad, an bagong Jerusalem, na nag-iibaba hale sa langit gikan sa Dios, garo nobya na nakagubing nin pangkasal asin masabat sa nobyo niya. Nadangog ko an sarong makosog na tingog hale sa trono na nagsabi, ‘Ngunyan an erokan nin Dios nasa mga tawo na! An Dios mismo mag-eerok kaiba ninda asin sinda magigin banwaan niya. An mismong Dios an magigin kaiba ninda asin siya an magigin Dios ninda. Papahidon niya an gabos nindang luha. Mayo na nin kagadanan, kamondoan, pagtangis o kasakitan, huli ta napara na an mga daan na bagay.’” (Kap. 21:1–4 mbb)
An buhay sa Banal na Syudad laen sa buhay kan mga tawo ngonyan. Kun an buhay digdi sa kinaban panopano nin sakit asin kamondoan, sa Banal na Syudad dai na nin sakit asin kamunduan o pagtangis. Halipot asin may sagkodan an buhay nin tawo ngonyan alagad sa Banal na Syudad mayo nang kagadanan nin huli ta siya magkakaigwa nin buhay na daing kasagkoran. (Tito 1:2 mb). Kun igwa nin inhustisya sa kinaban na ini, an Banal na Syudad pighahadean nin hustisya. (II Ped. 3:13 mbb).
Mayo nin siisay man na nasa tamang pagisip an mahabo sa buhay na mayo nin sakit, helang, asin kagadanan—an buhay na maabot na maoogma sa Banal na Siyudad o kahadean nin Dios. Alagad gabos daw na tawo makakalaom kaini? Pano makakasigurado an tawo na makakaiba siya sa igwang paglaom sa maabot na buhay?
An inaasegurar kan Biblia na mga tawong magmamana kan kahadean nin Dios iyo idtong mga ibinalyo Niya sa kahadean kan Saiyang Aki o ki Cristo. Sinda iyo idtong mga pinatawad sa kasalan nin huli ta sinda nilinig o tinubos kan dugo kan Kagurangnan na Jesukristo (Col. 1:12–14). Kaya, importante na maisegurar kan tawo na kaiba siya sa mga pigtinubos kan dugo ni Cristo—an mga makakaibanan Niya asin nin Dios sa Banal na Siyudad asin magkakaigwa nin buhay sa maabot . An lugar kan mga tinubos kan dugo ni Cristo, segun sa Bibliya, iyo an Iglesia Ni Cristo (Gibo 20:28 Lamsa Translation, Binikol).
Sa Aldaw nin Paghukom, an mga pigtinubos kan dugo ni Cristo o an mga miyembro kan Iglesia Ni Cristo inaasegurar kan Biblia na “dai na magugutom, asin … dai na sinda mapapaha duman sa Banal na Siyudad.” Asin “an saldang dai makaperwisyo [matama; mapakol] sainda, asin mayong [nakakapasong] init an matupok sa sainda, huli ta an Kordero na yaon sa tahaw kan trono iyo an magigin saindang pastor.” Segun sa Biblia, “papahidon nin Dios an gabos na luha sa saindang mga mata” (Apo. 7:13–17 Expanded Bible, Binikol).
Nungka, an mga miyembro kan Iglesia Ni Cristo dai nanggad nagkakanugon na enuton an saindang pagigin Iglesia Ni Cristo sa ano pa man na bagay sa buhay na ini. Bakong kawaran para sainda an paghihingoha sa pagserbi sa Dios sa laog kan tunay na Iglesia huli ta piglalaoman ninda an Saiyang panuga na buhay sa maabot.