Dako an maibubulig ha aton han durudilain nga kinaadman nga aton nahibabaruan ha eskwelahan ngan pinaagi han kalugaringon nga pag-aram. Kon gagamiton naton ito  ha husto nga paagi, ma-uswag kita ngan magigin matinalampuson ha aton mga buhat. Sanglit, magtinguha kita nga madugangan pa ngan humalapad o humalarom an aton kinaadman basi mas dako pa nga pagdaog an aton maabot, sugad han  siring han Baraan nga Kasuratan:

“Pagbuhati hin maupay an imo kalugaringon ngan pag-admi an ngatanan nga imo mahihimo; niyan hinumdomi an imo hinbabaroan ngan magmamaisnuwagon ka.” (Pro. 19:8 mbbsam)

Makakabulig an pagbabasa han angay nga mga libro ngan an pamamati ha igintututdo han mga tawo nga may igo ngan husto nga kinaadman ha aton ginhihimo. Labaw ha ngatanan, kinahanglan naton an pakig-upod han Diyos basi kita magdaog:

“Kon dapig ha amon an Diyos magdadaog kami; pipirdehon niya an amon mga kaaway.” (Salmo 60:12 mbbsam)

Kon paunan-o makakaupod an Diyos ha aton kinabuhi, sugad hini an ginbuhat han Iya siyahan nga mga alagad:

“Kay hiya nagkapot hin hugot han GINO-O; waray hiya bumulag ha pagsunod ha Iya, kundi gin-hirutan an Iya mga sugo o balaod nga iginsugo han GINO-O kan Moises. An GINO-O kaupod niya; bisan ngain hiya kumadtonagdadaog hiya …” (II Hadi 18:6–7 Ang Bagong Ang Biblia, iginbalhin ha Waray-waray nga yinaknan.)

Natagamtaman ni Hadi Ezechias an pakig-upod han Ginoong Diyos tungod kay “waray hiya bumulag ha pagsunod ha Iya, kundi gin-hirutan an Iya mga sugo nga ginsugo han Ginoo.” Amo naman ini an pagpamatuod han Ginoong Jesucristo kun kay ano nga kaupod Niya an Amay nga nagsugo ha Iya:

“Ngan kaupod ko an nagsugo ha akon; waray ako niya pagpabay-I nga mag-usaan, kay dayuday ko binubuhat an nakakalipay ha Iya.” (Juan 8:29 mbbsam)

Kon sugad, masisiguro naton an pakig-upod han Diyos kon kita magsusunod ha Iya ngan buhaton an nakakalipay ha Iya. Kaburut-on han Diyos nga “maluwas an ngatanan nga tawo ngan mahibaro han kamatuoran” (I Tim. 2:3–4 mb). Basi matuman ini nga Iya kaburut-on, igintutdo han Ginoong Jesucristo an usa han mga kamatuoran nga sadang matuman ha tawo basi makalipay ha Ginoong Diyos ngan makahatag ha tawo hin kaluwasan:

“Sanglit, nagyakan utro hi Jesus: Bug-os nga kamatuoran, ginsisiring ko ha iyo. Ako an ganghaan han toril han mga karnero. … Ako an ganghaan; an bisan hin-o nga tawo nga sumulod ha panon pinaagi ha akon an maluluwas. …” (Juan 10:7 ngan 9 tikang ha Revised English Bible, ngan iginbalhin ha Waray-waray nga yinaknan)

An panon nga iginsiring nga sadang sudlon o apihan amo an Iglesia Ni Cristo (Buhat 20:28 Lamsa Translation). Sanglit hini nga panahon, an pakig-upod han Ginoong Diyos maabot han tawo kon hiya bulig han tinuod nga Iglesia Ni Cristo. Kondi diri la basta bulig, kundi an kinahanglan diri nabulag ha pagsunod ha Diyos ngan pirme ginbubuhat an nakakalipay ha Iya. Tinguhaon ngan  paningkamoton naton nga maabot an pirme nga pakig-upod han Ginoong Diyos. Basi matuman ito, kinahanglan naton nga hul-os nga pamatud-an an aton paghigugma ha Iya pinaagi han kinasing-kasing nga pagtuman han Iya mga sugo (I Juan 5:3), kaupod an pag-api ha Iglesia Ni Cristo.