Dakulaon an kinaaraman kan buhay kan tawong matanos sa atubangan kan Dios tanganing ma-recibe kan sa iyang mga uripon an Saiyang mga bendisyon. Arug kaine an nakasurat sa Bibliya:

“An maldisyon nin Kagurangnan yaon sa harong kan maraot, alagad benebendisyonan niya an erokan kan matanos.” (Talinhaga 3:33, Marahay na Bareta Biblia)

Maw-ot kan Dios na kita matanos tanganing mapa satuya asin kan satuyang pamilya an saiyang mga bendisyon. Ano pa an naka-preparar na guiguibuhon kan Dios sa mga matanos?

“Binabantayan nin Kagurangnan an mga matanos asin dinadangog niya an saindang inagrangay; … Kun minaagrangay an mga matanos, dinadangog nin Kagurangnan;

iliniligtas niya sinda sa gabos nindang kasakitan.” (Salmo 34:15, 17 mbb)

Sa buhay pa sana na ine pakikinabangan ta na an pagkaka-igua nin matanos na buhay por dahil an matanos an pigbabantayan kan Dios, pigdadangud Niya sa mga pagagrangay asin pigliligtas Niya sa kasakitan.

An uripon kan Dios na matanos an nabubuhay sa pagtubod:

“Alagad an sakong banal mabubuhay huli sa pagtubod: Asin kun sia sumibog, an sakong kalag dai maoogma saiya.” (Hebreyo 10:38 An Biblia)

An nabubuhay sa pagtubod ipigbubuhay an pagtubod ni Cristo (Galasya 2:20). Kaya yaon sa iya an kaisipan Kan Kagurangnan na si Jesuscristo, an pagkamakinuyog-kuyog sa kabobotan Kan Diyos sagkud sa saiyang kagadanan (Filipos 2:5, 8).

An matanos na uripon nin Dios igua nin banal na takot sa Kagurangnan:

“An naglalakaw sa katanosan natatakot sa Kagurangnan, alagad an may bikong pamumuhay minasikwal saiya.” (Talinhaga 14:2 mbb)

An may banal na takot sa Dios naglilikay sa karatan:

“Pinapatawad an kasalan huli sa kaimbodan, asin malilikayan nin tawo an karatan huli sa pagkatakot sa Kagurangnan.” (Talinhaga 16:6 mbb)

Guibuhon ta na permanenting giya kan satuyang buhay an pagkamatanos asin pagkamakuyog-kuyog sa magna ipigsusugo kan Dios tanganing permi man na natataw-an niato nin kamurawayan an Dios tanganing resibehun ta an Saiyang mga kadakul na bendisyon.