Labihang kadako ang kalabtanan sa pagkinabuhi og matarong atubangan sa Dios aron madawat sa Iyang mga ulipon ang Iyang mga panalangin. Ingon niini ang pahayag sa Bibliya:

“Tinunglo sa Ginoo ang panimalay sa mga daotan, apan panalanginan niya ang panimalay sa mga matarong.” (Panultihon 3:33 Ang Pulong Sa Dios (APSD-CEB)

Buot sa Dios nga magmatarong kita aron mabatunan nato ug sa atong panimalay ang Iyang mga panalangin.

Unsa pa ang andam buhaton sa Dios sa mga matarong?

“Bantayan sa Ginoo ang matarong ug dunggon niya ang ilang pagtuaw…

Nagsangpit sa Ginoo ang mga matarong ug sila gipatalinghogan niya, ug giluwas gikan sa tanan nilang kalisdanan.” (Salmo 34:15, 17 Maayong Balita Biblia)

Dinhi pa lamang nga kinabuhi-a mapuslan na nato ang pagbaton ning maong hiyas tungod kay ang matarong sagupon sa Dios, dunggon Niya ang pagtawag o pag-ampo, ug luwason sa mga kakuyaw.

Ang ulipon sa Dios nga matarong nagkinabuhi sa pagtoo:

“Apan ang akong tawo nga matarong magkinabuhi pinaagi sa pagtuo, ug kon siya mosibog man, kaniya walay kalipay ang akong kalag.” (Heb. 10:38)

Ang magkinabuhi sa pagtoo gikinabuhi ang pagtoo ni Cristo (Gal. 2:20). Busa gibatunan niya ang hunahuna sa Ginoong Hesucristo, ang pagkamasinulondon sa kabubut-on sa Dios hangtud sa kamatayon (Fil. 2:5, 8).

Ang matarong nga ulipon sa Dios adunay balaanong kahadlok sa Ginoo:

“Siya nga naglakaw diha sa katarong nahadlok sa Ginoo, apan siya nga malimbongon sa iyang mga pamaagi nagtamay kaniya.” (Panultihon 14:2 Ang Biblia Ceb.)

Ang  adunay balaanong kahadlok sa Dios magpahilayo sa kadautan:

“Tungod sa pagkamaunongon ug sa pagkamatinumanon ang kasal-anan gipasaylo, tungod sa pagkahadlok sa Ginoo ang tawo molikay sa daotan.”  (Panultihon 16:6 Ang Biblia Ceb.)

Buhaton natong kanunayng tulumanon sa atong kinabuhi ang pagkamatarong ug pagkamasinulondon sa mga sugo sa Dios aron magpabiling mahatagan nato og kahimayaan ang Dios ug sa maong paagi, batonan nato ang Iyang madagayaong panalangin.