Ang kapalaran sang matarong
Ang kapalaran sang matarong
La Biblia enseña sobre una sola verdadera Iglesia y cuyo nombre es “Iglesia De Cristo,” que es profetizada, y cree que solamente el Padre es el Dios verdadero
Por ROMMEL V. SAN PEDRO
May dako nga kaangtanan ang pagpangabuhi sang matarong sa atubangan sang Dios para mabaton sang Iya mga ulipon ang Iya mga pagpakamaayo. Amo sini ang ginasiling sa Biblia:
“Ginapakamalaot sang Ginoo ang panimalay sang mga malaot, pero ginapakamaayo niya ang panimalay sang mga matarong.” (Hulubaton 3:33 Ang Pulong sang Dios)
Gusto sang Dios nga mangin matarong kita para maangkon naton kag sang aton panimalay ang Iya mga pagpakamaayo.
Ano pa bala ang nakahanda nga himuon sang Dios sa mga matarong?
“Ginabantayan sang Ginoo ang mga matarong, kag ginapamatian niya ang ila pagpanawag. … Nagapanawag sa iya ang mga matarong, kag ginasabat niya sila. Ginaluwas niya sila sa tanan nila nga kalisod.” (Salmo 34:15, 17 Ang Pulong sang Dios)
Sa kabuhi pa lang nga ini mangin mapuslanon na ang pagpangabuhi sang matarong bangud sila ang ginabantayan sang Diyos, ginapamatian ang ila pagpanawag ukon ang ila pagpangamuyo, kag ginaluwas sila sa tanan nga mga kalisod.
Ang matarong nga ulipon sang Dios nagakabuhi sa pagtuo:
“apang ang akon matarung magakabuhi sa pagtoo, kag kon mag-isul sia, ang akon kalag walay kahamuut sa iya.” (Hebreo 10:38 Ang Biblia-Hiligaynon)
Ang nagakabuhi sa pagtuo ginapangabuhi ang pagtuo ni Cristo (Galacia 2:20 Ang Biblia-Hiligaynon). Gani may yara siya sang panghunahuna nga kasubong sang Ginoong Jesu-Cristo nga masinulondon sa kabubut-on sang Dios tubtob sa kamatayon (Filipos 2:5, 8 Ang Biblia-Hiligaynon).
Ang ulipon sang Dios nga nagakabuhi sing tadlong ukon sang matarong may ara sang balaan nga kahadlok sa Ginoo:
“Ang nagalakat sa iya pagkatadlong nagakahadluk sa Ginoo, apang ang balingag sa iya mga dalanon nagatamay sa iya.” (Hulubaton 14:2 Ang Biblia-Hiligaynon)
Ang may balaan nga kahadlok sa Dios nagatalikod ukon nagalikaw sa kalautan:
“Tungud sa kalooy kag kamatooran ang kalautan ginatumbasan, kag tungud sa kahadluk sa Ginoo ang tawo nagatalikod sa malaut.” (Hulubaton 16:6 Ang Biblia-Hiligaynon)
Himuon naton nga palatukuran sang aton pangabuhi ang mangin matarong kag masinulondon sa mga kasuguan sang Dios para mahalaran naton Siya sang kahimayaan kag sa sina mabaton naton ang Iya bugana nga mga pagpakamaayo.
