Ing bie ngeni
at ing bie a datang
Ing bie ngeni
at ing bie a datang
La Biblia enseña sobre una sola verdadera Iglesia y cuyo nombre es “Iglesia De Cristo,” que es profetizada, y cree que solamente el Padre es el Dios verdadero
Nang GERSON S. NONATO
Marakal ing makasubsub ka reng kalingapan keng bie a iti. Ating sasabi na kulang ya pa ing oras at aldo keng dakal da reng dapat asikaswan. Halus gagawang aldo ing bengi at halus ali na magpaynawa uli ning pamanintunan, pamagaral, at aliwa pang bage na para keng bie ay iti. Gagawan da iti keng pamaniwalang mamie yang masanting a bie iti karela.
Ali marok a magnasa at magpilit ing tau a maging mayap ing kabilian ning kayang bie king yatung iti. Oneng, ing ali da balu deng aliwa a ating maygit a maulaga kesa king bie ngeni—ing bie a datang.
Inya nung makananu ingatan ning tau ing keyang bie ngeni at pagkapilitan nang asalese iti, lalung dapat neng pagsadian at pagkapilitan a akua ing bie a datang. Nanu ing maragul a pamiyaliwa ning bie ngeni at bie a daratang inya maygit na dapat pagsadian at pagpilitan ning tau a akua ing bie a datang?
Sinabi ning Biblia nung nanung uring bie ya atin ing tau ngeni:
“Ing bie ning tau a beit ning babai makuyad ya mu, at dakal ya kaligaligan. Mibubukadkad yang anti ing bulaklak, at kaybat malanat ampon malagas; kalupa ning anino agad yang lilipas.” (Job 14:1–2 Ing Mayap a Balita Biblia)
Pepakit na mu rin ning Biblia ot mitmu yang kasakitan ing bie ning tau king yatu:
“Nanu mo ing pakinabang na ning tau king sablang depat nat kapagalan lalam na ning mapaling aldo? Kabang mabibie ka e mako ing problema at kasakitan. Agyang neng bengi ing kaisipan mu e ya mipaynawa. Ing sabla ala ngang kabaldugan.” (Ecclesiastes 2:22–23 Ing Mayap a Balita Biblia)
“At agyang pang ing tau mika puri, mika matas a penigaralan, at pibandian keng bieng iti, agpang king Biblia, ing anggang pipagalan na—piyunanan ne man iti ning beluan at kabiasnan—ali ne adala keng kayang pangamate.” (Ecclesiastes 2:21; 5:15 Ing Mayap a Balita Biblia)
Nanu pa ing siguradung a aranasan ning tau nanuman ing estado ning keyang bie—makuwalta o kalulu, mekapagaral o ali? Makanini ing sasabian ning Biblia:
“Pakigisanan tamu ing bie tamu king karalumduman at kalungkutan, magugulu tamu isip, sasakit tamu, at mimimua.” (Ecclesiastes 5:17 Ing Mayap a Balita Biblia)
Ing sakuna, labanan, katampalasan, kaguluan, at kasakitan pilan lamu kareng mamie kabalisan at pagsalbat king bie ning tau. Ing mamie pa kasakitan keng pamibiebie ngeni king yatu ing alang hustisia:
“Ikit ku munaman king alang hustisia keti king yatu. Kikiak la ding megipit at ala mang bisang sumaup karela uling mayupaya la detang menggipit karela!” (Ecclesiastes 4:1 Ing Mayap a Balita Biblia)
Nung ding mebanggit ing larawan ning bie ngeni, nanu naman ing maragul a pamiyaliwa keni ning bie a daratang a yang lalung dapat pagnasan ning tau?
Ing datang a bie apin ing bie king “bayung yatu at bayung banua” a pengaku ning Dios. Karin, ding mumunang bage linipas nala:
“Ngana ning Ginu, Lalang kung bayung yatu at bayung banua. Lubus nang makalinguan ing milyari king milabas.” (Isaias 65:17 Ing Mayap a Balita Biblia)
Ing bayung banua at bayung yatu apin ing a ausan a “Banal a Siudad”:
“Kanita ikit ke ing metung a bayung banua at ing metung a bayung yatu. Ala ne ing sadiang banua at yatu; ala nia naman ing dagat. At ikit ke ing Banal a Siudad, ing bayung Jerusalem, titipa yang ibat banua, ibat ya king Dios. Anti ya king babaing kakasal; makagayak ya ban salubung king lalaking maging asawa na. Kabud-abud dimdam ke ing masikan a siwalang ibat king tronu. Ngana, Ngeni, ing tuknangan na ning Dios atyu libutad da ring tau! Manuknangan yang kayabe da ring tau at maging balen na la. Akayabe re ing Dios at ya ing maging Dios da. Pulisan na ing lua karing mata ra. Mawala na ing kamatayan, ing kalungkutan, ing tangis, at ing kaplas, uling linipas na la ding bage matua.” (Kapayanagan 21:1–4 Ing Mayap a Balita Biblia)
Ing bie karin aliwang-aliwa ya keng bie ning tau ngeni. Nung ing bie kening yatu mitmu yang kasakitan at kalungkutan, karin king Banal a Siudad ala nang kasakitan at kalungkutan. Makuyad at atin angganan ing bie ngeni ning tau, oneng king Banal a Siudad ala nang kamatayan uling ing bie a maging tagle na apin ing bie a alang angga (Tito 1:2 Ing Mayap a Balita Biblia). Nung keni king yatu ating pigkaymutan hustisia, ing Banal a Siudad pag-arian yang hustisia (II Ped. 3:13 Ing Mayap a Balita Biblia).
Alang ninuman atyu king ustung isip ing e mabisa keng bie a alang kasakitan, salun at kamatayan—ing bie a datang a akamtan king Banal a Siudad o kayarian ning Dios. Oneng heganagana kayang tau makapanalig keni? Makananu na asiguradu ning tau a miyabe ya kareng ating kapanayan king bie a datang?
Ing siguraduan na ning Biblia a magmana ning kayarian ning Dios deng taung linipat Na king kayarian ning Keyang Anak o i Cristo. Ila ing mipatawad keng kasalanan uling lininis o inatbus ning daya ning Ginung Jesucristo (Colosas 1:12–14). Inya maulaga a asiguradu ning tau na kayabe ya kareng inatbus ning daya nang Cristo—deng akayabe Na at ning Dios king Banal a Siudad at magmana ning bie a daratang. Agpang king Biblia, atsu la king Iglesia Ni Cristo reng inatbus ning daya nang Cristo. (Gawa 20:28 Lamsa Translation).
King Aldo ning Pamanukum, ing inatbus ning daya nang Cristo o deng miembru ning Iglesia Ni Cristo ing siniguradu ning Biblia a “e na la dumanup man, at e na kumau kapilan man karin king Banal a Siudad.” At “ing aldo e ya makapanasakit [tutud; mamatbat] karela at alang [makapaltus] a pali ing mamuksa karela uling ing Cordero a atyu libutad ing maging karelang pastul.” Agpang keng Biblia, “pulisan ning Dios ing anggang lua karing mata ra” (Apoc. 7:13–17 Expanded Bible, sinalin ibat king Ingles).
Inya e de kapilan man pang-inayangan ding miembru ning Iglesia Ni Cristo ing iyuna ing karelang panga-Iglesia Ni Cristo kesa nanumang bage king bie a iti. Ali pangalugi para karela ing sablang kasakitan king uli na ning pamanyuyu king Dios king kilub ning tune a Iglesia uling asahan da ing Keyang pangaku a bie a datang.