Atin yang maragul a ayisaup keka tamu deng miyaliyaliwang kabalwan a ababalu tamu keng eskwela at keng kapamilatan ning sariling pamanigaral.  Panga ginamit talang ustu deni sumulung tamu at managumpe keng kekatamung pamirapat-dapat. Inya, magsikap tamu na miragdagan pa at lumalam ing keka tamung kabiasnan ban sukat pang tagumpe ing akwa, kalupa na ning sasabyan ning Banal a Kasulatan.

“Itang bisang makapagaral ing sarili na ya ing sasaupan na; itang paulagan na ing kabiasnan tagumpe ing akua na.” (Kasabian 19:8 PmPV)

Makasaup ing pamamasang angkup a libru at ing pamakiramdam keng tuturu da reng taung ating sapat at istung kabiasnan kareng kekatamung daraptan.

Migit keng heganagana, kelangan ta ya ing pamakiabe ning Diyos ban managumpe tamu:

“King saup ning Dios tagumpe kekatamung kamtan; sambutan na lang kekatamung kalaban.” (Ding Dalit 60:12 PmPV)

Kung makananu akayabe ing Diyos keng kekatamung bie, makanini ing gewa da reng minunang talasuyu Na:

“Menalig ya i Hezekia king Ginu, ing Dios ning Israel. E ne mika ari pa ing Juda a antimo ya, agyang king milabas a panaun bayu ya mig-ari o detang sinalisi. Menatili yang tapat king Ginu at e sinalangsang karing utus na. Pemintuan na la ngan ding utus a binie ning Ginu kang Moises. Pitnubayan ne ning Ginu at meging matagumpe ya king heganagana nang gewa …” (II Ding Ari 18:5–7 PmPV)

Aranasan neng Aring Hezekia ing pamakiabe ning Ginung Diyos uling “menatili yang tapat king Ginu at e sinalangsang karing utus na … pemintuan na la ngan ding utus a binie ning Ginu.”  Ayni naman ing pamipatutu ning Ginung Jesucristo nung baket akayabe Ne ing Ibpa a mengitubud Keya:

“Kayabe ke ing mengitubud kanaku; e na ku likuan dili-dili uling daraptan kung parati ing makibie tula keya.” (Juan 8:29 PmPV)

Inya, asisiguru tamu ing pamakyabe ning Diyos nung pamintuan ta Ya at daptan tamu ing makaibie tula Keya.

Kaburian ning Diyos a “miligtas la ding sablang tau at mabiasa la king katutuan” (I Tim. 2:3–4 PmPV).  Ban milyari ing kaburian Nang iti, tiru nang Ginung Jesucristo ing metung kareng katutuan a sukat matupad keng tau ban makaibie tula king Ginung Diyos at munie kaligtasan keng tao:

“Inya pasibayu yang megsalita i Jesus: mabilug a katutuan kung sasabian kekayu. Aku ing pasbul na ning kural da ring tupa. … Aku ing pasbul; ninumang taung lungub king kilub na ning kawan king kapamilatan ku miligtas ya. …” (Juan 10:7 at 9 Revised English Bible, sinalin ibat king Ingles).

Ing kawan a tutukuyan a dapat luban o aniban, alang aliwa nung ali, ing Igesia Ni Cristo (Ding Dapat 20:28 Lamsa). Inya king panaun ayti, atanggap ning tau ing pamakiabe ning Diyos nung miyembru ya king tune a Iglesia Ni Cristo.  Oneng, ali basta miyembru mu, nune ing kelangan ali kakawani king pamamintu king Diyos at ing pane daraptan itang makaibie tula Keya.

Pagnasan at pagsikapan tamung atanggap ing pamakiabe ning Ginung Diyos. Ban milyari ita, kelangan tamung lubus a apatunayan ing kekatamung lugud Keya king kapamilatan na ning mabilug tamung puso a pamanupad kareng Keyang utus (I Juan 5:3), kayabe ing pamaglub king Iglesia Ni Cristo.