Gipaila sa Biblia ang duha ka managlahing matang sa tawo ug ang ilang managlahing dangatan. Ang usa ka matang mao ang matarong ug ang usa pa mao ang dautan.

“Ang tawo nga nagakinabuhi nga matarong nagatahod sa Ginoo, apan kadtong wala nagakinabuhi nga matarong nagatamay kaniya.” (Panultihon 14:2 Ang Pulong sa Dios”)

“Siya nga molahutay sa pagkamatarong mabuhi, apan kadtong nangita sa daotan mamatay.“ (Panultihon 11:19 Ang Biblia Cebuano 2011)

Ang nagkinabuhi nga sukwahi o dautan ay padulong sa kamatayon o pagka-alaut, samtang ang tawo nga nagkinabuhi og matarong mao ang makakaplag sa kinabuhi.

Dili nato gusto nga maalaut, hinuon gitinguha nato nga makabaton og kaluwasan ug kinabuhi nga walay katapusan sa Adlaw sa Paghukom.
Busa, ipadayon nato ang matarong nga pagkinabuhi bisan padayon pa nga nagasamot ug nagakaylap ang kadautan sa kalibutan. Unsaon nato kini pagtuman?

• Ikinabuhi nato ang mga pagtulon-an sa Dios nga gitudlo Niya pinaagi sa mga gihatagan Niya og katungod nga magwali (II Juan 1:9; Juan 14:21 ug 23 Maayong Balita rcpv1999).
• Dili kita magbuhat sa bisan unsa man nga dautan o supak sa mga pagtulon-an sa Dios. (Roma 6:1-2 ug 12-15 mb1999).
• Bisag anaa kita sa kalisdanan o kakabus dili nato panig-ingnan ang mga tawo nga nagabuhat og dautan nga ang ilang pangatarungan subay sa panultihon nga “ang taong nagigipit, kahit sa patalim kumakapit” nga ang buot ipasabot, kon muabot ang kalisod maoy buhaton bisag ang dili matarong. Pananglitan, aron lang makalingkawas sa kalisud kay mangawat o mosalmot sa ilegal nga buluhaton (Isa. 55:7 mb1999).
• Paningkamutan nato nga magkinabuhi sumala sa kabubut-on sa Dios nga adunay pagpugong sa kaugalingon (self-control) ug dili pagbuhat sa unsay maibgan bisan dautan. Dili usab angay magdinanghag sa pagbuhat ug dili madani sa mga binuhatan nga dili diosnon (Tito 2:12 Ang Biblia Cebuano 2011).
• Mag-ampo kita aron mangayo ug tabang sa Dios. Pinaagi niana atong ikapadayag Kaniya kung unsa ang atong mga laraw aron dili kita masayop sa atong mga paghukom (Mar. 11:24; Salmo 145:18 mbceb99).

Angay natong mahinumduman nga, “Makita sa Ginoo ang tanan, bisan asang dapita. Nagatan-aw siya sa mga binuhatan sa mga daotan ug sa mga matarong” (Panultihon 15:3 Ang Pulong sa Dios). Busa, padayon natong tumanon ang gitudlo sa Bibliya nga magkinabuhi sumala sa mga pagtulun-an sa Dios.