Walay baleg ya nitulong ed sikatayo so nanduruman kakabatan ya naaralan ed eskuelaan tan diad bukor ya panagaral. No usaren tayo iratan ed dugan paraan et onabante tan onaligwas itayo ed saray kimey tayo. Kanian, pansagpotan tayo ni ya padakelen ni tan palawaken o paaralemen so saray kakabatan tayo pian mas angkabaleg ni iran pananalungaring so nagamoran tayo, singa say ibabaga na Masanton Sulat:

“Say mansasagpot a manaral ed inkasikato et mangaaro Say mamapabli ed pikakabat et ontalona.” (Kaw. 19:8 Impatalos ed Pangasinan manlapud Magandang Balita Biblia)

Makatulong so panagbasa na saray makanaan iran libro tan say pandengel ed ibabangat na saray totoon walaan na suston kakabatan ed gagawaen tayo.

Manuna ed amin, kaukolan tayoy tulong na Dios pian manalungaring tayo:

“No say Dios so kaiba, kaiba ed dapag mi, nagamoran so pananalungaring, natalo so kalaban.” (Awit 60:12 Impatalos ed Pangasinan manlapud mb)

No panon a say Dios et nakaiba tayo ed bilay tayo, onya so ginawa na saray lingkor to nen saman:

“Lapud sikatoy binmenben ya malet ed KATAWAN; sikatoy ag inmarawi ed panangunor ed sikato, ingen inalwaran so saray ganggan to ya inggangan na KATAWAN ed kinen Moises. Say KATAWAN et kaiba to; inerman so laen to et sikatoy mananalungaring …” (II Harı 18:6–7 Impatalos ed Pangasinan manlapud Ang Bagong Ang Biblia)

Naeksperiensya nen Arin Ezekias so piuulop na Katawan a Dios lapud “sikatoy ag simian ed itotombok ed sikato, ingen inalwaran to ray ganggan na Katawan.” Saya met so paneknek na Katawan a Jesu-Cristo no akin a Sikato so kaiba na Ama ya angibaki ed Sikato:

“Tan kaibak imay angibaki ed siak; agto ak tataynanan, ta gagawaen ko lawas iray makapaliket ed sikato.” (Juan 8:29 Impatalos ed Pangasinan manlapud mb)

Kanian, nasisiguro tayo so piuulop na Dios no Sikatoy unoren tayo tan gawaen tayo so makapaliket ed Sikato.

Linawa na Dios a “nilaban so amin a totoo tan naamtaan day katwaan” (I Tim. 2:3–4 Impatalos ed Pangasinan manlapud mb). Pian nagawa ‘ya so linawa To, imbangat na Katawan a Jesu-Cristo so sakey ed saray katwaan a nepeg a sumpalen na too pian napaliket so Katawan a Dios tan mangiter ed too na kilalaban:

“Kanian inkuan lamet nen Jesus: Nagnap a katwaan ya ibabagak ed sikayo. Siak so pinto na kulongan na carnero. … Siak so pinto; Siopaman a too so onloob ed kasimpokokan ed panamaegley ko et nilaban. …” (Juan 10:7 at 9 Impatalos ed Pangasinan manlapud Revised English Bible)

Say kasimpokokan ya tutukuyen ya nepeg ya looban o pimoyongan et anggapoy arom no ag say Iglesia Nen Cristo (Gawa 20:28 Impatalos ed Pangasinan manlapud Lamsa Translation). Kanian diad sayan panaon, Say piuulop na Dios et nagamoran na too no sikato et membro na tuan Iglesia Nen Cristo. Balet aliwa labat ya miembro no agta say kaukolan et ag unsisian ed panangonor ed Dios tan lawas ya gagawaen to so makapaliket ed Sikato.

Panpilaleken tan pansagpotan tayon nagamoran so lawas ya piuulop na Dios ya Katawan. Pian nagawa itan, kaukolan tayon nagnap a paneknekan so panangaro tayo ed Sikato diad panamegley na impapuso ya panangunor ed saray gangan To (I Juan 5:3 Impatalos ed Pangasinan manlapud Dating Salin), kaibad satan so pimomoyong ed Iglesia Nen Cristo.