Say kulaan na kilalaban
Say kulaan na kilalaban
La Biblia enseña sobre una sola verdadera Iglesia y cuyo nombre es “Iglesia De Cristo,” que es profetizada, y cree que solamente el Padre es el Dios verdadero
Por ROMMEL V. SAN PEDRO
Kasipuran lan ugali na too so onlan tampol ed kaliktaran ton lugar no onsasabi ed sikato so kaatapan. Dia ed pegley na gunigon, sikato’y manaanap na napansalimbengan. Dia ed agew na panangukom, ag naamperan na too ya arapen so sankabalegan ya peligro ed bilay to lapud saman ya agew et ipaakseb na Katawan so panangukom To ed katooan – deralen To ed panamegley na apuy so saray mangaruksan totoo (II Pedro 3:5–7 Say Biblia Pangasinan) tan ibantak ira ed dayat ya apuy o say komaduan ipapatey (Puyan 20:14; Roma 6:23 Say Biblia Pangasinan). Ibabangat na Biblia ya likud ed Katawan a Jesu-Cristo, amin ya totoo et nankasalanan (Roma 5:12; I Pedro 2:21–22 Say Biblia Pangasinan), kanyan, amin ya too et mankaokolan na kilalaban ed Agew na Panangukom.
Dia ed panaon na Cristiano, impakabat na Dios so panangaro To tan panangasi ed too dia ed panamegley na manunan kanonotan para ed kilalaban to—ya amin a too et onloob ed Iglesia ya laman nen Cristo:
“Sikato komon et naitdan na gloria ya anggad angga dia ed andi anggaan na panaon lapud manunan kanonotan to ya kilalaban para ed iglesia ed panamaegley nen Jesucristo.” (Efeso 3:21 Living Bible, Impatalos manlapud Ingles)
“Ta say asawan laki sikato so olo na asawan bii, a singa si Cristo met sikato so olo na iglesia, a sikaton dili so manangilaban ed laman.” (Efeso 5:23 Say Biblia Pangasinan)
“Tan sikato so olo na laman, a say iglesia.” (Colosas 1:18 Say Biblia Pangasinan)
Say Iglesia ya ilaban nen Cristo et say sinaliw o dinondon To na dala To—say Iglesia Nen Cristo:
“Aluaran yo so ikasika yo’n dili, tan say amin a kasimpokokan ya anginan ed sikayo na Espiritu Santo a managbantay, pian pakanen so Iglesia Nen Cristo, a sikato so sinaliw to na dala to.” (Gawgawa 20:28 Lamsa Translation, Impatalos manlapud Ingles)
Kanian, say Iglesia Nen Cristo so kawalaan na kaliktaran. Dia makaromog so too na salimbeng ed agew na sanok na Dios lapud saya so iliktar na Katawan ya Jesu-Cristo.
Kanyan, no say sakey ya too et manmaliw ya miembro na Iglesia Nen Cristo, nepeg ton mansiansian masekder ed inkapili to, kaokolan ton sumpalen ya amin so kanepegan to, tan aluaran to so inka-Iglesia Nen Cristo to anggad kasampotan.
