Ti biag nga agdama
ken ti biag a sumangbay
Ti biag nga agdama
ken ti biag a sumangbay
La Biblia enseña sobre una sola verdadera Iglesia y cuyo nombre es “Iglesia De Cristo,” que es profetizada, y cree que solamente el Padre es el Dios verdadero
Ni GERSON S. NONATO
Adu ti tao a dagiti laeng pakaseknan iti daytoy a biag ti agawaanda. Adda dagiti mangibaga a kurang pay ti oras ken aldawda iti kinaadu ti rumbeng nga asikasuenda. Uray la nga aramidenda nga aldaw ti rabii ken uray no saanda nga aginanan gapu iti trabaho, panagadal, ken dadduma pay a banbanag nga agpaay laeng iti daytoy a biag. Ar-aramidenda daytoy gaputi pammatida a daytoy ti mangted kadakuada ti nasayaat a biag.
Saan a dakes a tarigagayan ken ikagumaan ti tao a sumayaat ti kasasaad ti biagna ditoy lubong. Numanpay kasta, ti saan nga ammo ti dadduma ket adda napatpateg ngem ti agdama a biag—ti biag a sumangbay.
Isu a no kasano nga annadan ti tao ti agdama a biagna ken ikagumaanna a mapasayaat daytoy, rumbeng a nangnangruna a pagsaganaan ken ikagumaana a magun-od ti biag a sumangbay. Ania ti dakkel a nagdumaan ti agdama a biag ken ti biag a sumangbay isu a nangnangruna a pagsaganaan ken ikagumaan ti tao a magun-od ti biag a sumangbay?
Impannayag ti Biblia no ania ti kasasaad ti biag ti tao ita:
“Ti biag ti tao ket ababa ken napnoan rigat, Aglaylay a kas ruot, agukrad a kas sabong, agpukaw a kas labutab, kas aniniwan nga aglabas.” (Job 14:1–2 Magandang Balita Biblia)*
Inladawan pay ti Biblia no apay a napnoan rigat ti biag ti tao ditoy lubong:
“Ania ti magunggona ti tao iti amin nga aramidna, pagbannogan ken panagagawana iti daytoy a lubong? Amin nga aramidenna iti unos ti panagbiagna awan ti magunggonana no di saem ken ladingit. Uray iti rabii, saan nga agtalna ti nakemmo. Awan serserbina amin daytoy.” (Ecles. 2:22–23 Naimbag a Damag Biblia)
Ken uray no makagun-od ti tao ti dayaw, nangato nga edukasion, ken kinabaknang iti daytoy a biag, segun iti Biblia amin a nagrigatanna—namuunanman isu iti sirib ken pannakaammo—ket saanna a maitugot iti ipupusayna (Ecles. 2:21; 5:15).
Ania pay ti sigurado a sagabaen ti tao aniaman ti kasasaadna iti biag—nabaknang man wenno napanglaw, nakaadal wenno saan? Kastoy iti kuna ti Biblia:
“Malaksid ditoy, ti biagtayo ket kanayon nga adda panagduduana, napno iti danag, ladingit, sakit ken pannakapaay.” (Ecles. 5:17 mb)*
Ti didigra, gubat, kinadangkes, riribuk, ken kinapanglaw ti sumagmamano kadagiti gapuanan ti danag ken ladingit iti biag ti tao. Mangpadpadagsen pay iti kasasaad ti panagbiag ita ditoy lubong ket ti kinaawan hustisia:
“Makitak manen dagiti amin a pannakairurumen a maar-aramid ditoy lubong. Agsasangit dagiti mailupitlupit ket awan tumulong kadakuada gapu ta adda bileg kadagiti mangidadanes kadakuada.” (Ecles. 4:1 ndb)*
No kasta ti ladawan ti biag ita, ania met ti dakkel a nakaidumaan ti biag a sumangbay nga isu ti rumbeng a tarigagayan ti tao?
Ti biag a sumangbay ket ti biag idiay “baro a langit ken baro a daga” nga inkari ni Apo Dios. Sadiay, dagiti immuna a banbanag ket napalabasen:
“Adtoy, parsuaek ti a baro langit ken baro a daga. Saanto a malagipen dagiti immuna a banbanag, wenno agsubli pay iti panunot.” (Isa. 65:17 New Pilipino Version)*
Ti baro a langit ken baro a daga ket isu ti maawagan a “Nasantoan a Siudad”:
“Ket nakitak ti baro a langit ken baro a daga, agsipud ta ti immuna a langit ken ti immuna a daga ket napukawen, awan metten ti baybay. Ket nakitak ti Nasantoan a Siudad, ti baro a Jerusalem, a bumabbaba manipud langit, aggapu iti Dios, a naisagana a kas maysa a nobia a naarkosan para iti nobiona. Ket nangngegko ti maysa a timek manipud iti trono a kunkunana, ‘Ita ti pagnaedan ti Dios ket adda kadagiti tattao, ket isu, agbalin a kaduada, ket agbalindanto a tattaona, ket ti Dios a mismo ti makaduada ket isuna iti agbalin a Diosda. Punasennanto ti tunggal lua kadagiti matada. Awanton ti ipapatay, awanton ti panagleddaang, awanton ti lua, awanen ti ut-ot, ta dagitoy a banbanag ket napalabasen.” (Apoc. 21:1–4 npv)*
Naiduma unay ti biag iti Nasantoan a Siudad iti biag ti tao ita. No ti biag ditoy daga ket napnoan rigat ken ladingit, idiay Nasantoan a Siudad awanen ti rigat ken ladingit wenno dung-aw. Ababa ken adda patinggana ti biag ita ti tao ngem idiay Nasantoan a Siudad awanen ti ipapatay agsipud ta ti magun-odnanto ket biag nga agnanayon (Tito 1:2 mb). No ditoy lubong ket adda mapapaidaman iti hustisia, ti met Nasantoan a Siudad ket pagturturayan ti hustisia (II Ped. 3:13 mb).
Awan ti siasinoman nga adda usto a panunot wenno nakemna nga agmadi iti biag nga awanen ti rigat, ladingit, ken ipapatay—ti biag a sumangbay a magun-odto idiay Nasantoan a Siudad wenno pagarian ti Dios. Ngem amin kadi a tattao ket makanamnama iti daytoy? Kasano a masigurado ti tao a karamanto isu kadagiti addaan namnama iti biag a sumangbay?
Ti sinigurado ti Biblia nga agtawidto ti pagarian ti Dios ket dagiti tattao nga inyakarna iti pagarian ti Anakna wenno ni Cristo. Isu dagiti napakawan iti basolda agsipud ta nadalusan wenno nasubbotda babaen ti dara ni Apo Jesucristo (Col. 1:12–14). Ngarud, nasken a masigurado ti tao a karaman isu kadagiti nasubbot babaen ti dara ni Cristo—dagiti makaduananto ken ti Dios idiay Nasantoan a Siudad ken mangsagrapto ti biag iti masakbayan. Iti ayan dagiti sinubbot ti dara ni Cristo, segun iti Biblia, isu ti Iglesia Ni Cristo (Aramid 20:28 Lamsa Translation).
Iti Aldaw ti Panangukom, dagiti nasubbot babaen ti dara ni Cristo wenno dagiti miembro ti Iglesia Ni Cristo ket isu dagiti sinigurado ti Biblia a “saandanton a pulos nga agbisin, saandanton a pulos a mawaw idiay Nasantoan a Siudad.” Ken “ti init ket saanto a makadadael [makapudot; sumaplit] kadakuada, ken awan [makasinit nga] init ti mangparmek kadakuada, agsipud ta ti Cordero nga adda iti tengnga ti trono ti agbalin a pastorda.” Segun pay ti Biblia, “punasento ti Dios ti tunggal lua kadagiti matada” (Apoc. 7:13–17 Expanded Bible, naialison manipud Ingles).
Isu a saan pulos a kailalaan dagiti miembro ti Iglesia Ni Cristo nga ipangruna ti kina-Iglesia Ni Cristo-da ngem iti aniaman a banag iti daytoy a biag. Saan a pakalugian kadakuada ti agsakripisio gapu iti panagserbida iti Dios iti uneg ti pudno nga Iglesia agsipud ta namnamaenda ti inkarina a biag nga agnanayon.
*Naipatarus manipud iti Filipino