Adda dakkel a maitulongna kadatayo ti nadumaduma a kinasirib a masursuro iti eskuela ken babaen iti bukod a panagadal. No aramatentayo dagidiay iti umiso, rumang-ay ken agballigitayto iti panagaramidtayo. Isu nga ikagumaantayo a manayunan pay ken lumawa wenno umuneg ti pannakaammotayo tapno ad-adu a balligi pay ti magun-odtayo, kas ti nailanad iti Nasantoan a Kasuratan:

“Ti ikagumaanna a makasursuro iti bukodna ket agayat Ti mangipateg ti pannakaammo ket aballiginto.” (Prov. 19:8 naipatarus manipud iti Magandang Balita Biblia)

Makatulong ti panagbasa kadagiti tumutop a libro ken panagdengngeg iti isursuro dagiti tattao nga addaan naan-anay ken umisu a pannakaawat iti  ar-aramidentayo.

Kangrunaan iti isuamin, masapultayo ti pannakikadua ti Dios tapno agballigitayo:

“Babaen iti tulong ti Dios, agballigitayto; isunto ti mangparmek kadagiti kabusortayo” (Salmo 60:12 Naimbag a Damag Biblia)

No kasano a makaduatayo ti Dios iti biagtayo, kastoy ti inaramid dagidi immuna nga adipenna:

“Nagtalek ni Hezekias iti APO a Dios ti Israel. Awanen ti ari a kas ken ni Hezekias a nagturay iti Juda, sakbay man wenno kalpasan ti panagturayna. Napudno iti APO ket pulos a di nagsukir kenkuana ngem sinalimetmetanna ketdi dagiti bilin nga inted ti APO ken Moises. Iti kasta, adda kenkuana ti APO ket nagballigi iti amin nga inaramidna. …” (II Ar-ari 18:5–7 ndb)

Nalak-am ni Ari Hezekias ti pannakikadua ni Apo Dios agsipud ta “pulos a di nagsukir kenkuana ngem sinalimetmetanna dagiti bilin nga inted ni Apo.”

Daytoy met ti pammaneknek ni Apo Jesucristo no apay a kaduana ti Ama a nangibaon Kenkuana:

“Kaduak ti nangibaon kaniak. Saannak a binaybay-an nga agmaymaysa, agsipud ta kanayon nga aramidek ti makaparagsak kenkuana.” (Juan 8:29 ndb)

No kasta ngarud, masiguradotayo ti pannakikadua ti Dios no agtulnogtayo Kenkuana ken aramidentayo ti makaay-ayo Kenkuana.

Pagayatan ti Dios a “maisalakan dagiti amin a tattao ken maamoanda ti pudno” (I Tim. 2:3–4 ndb). Tapno matungpal daytoy a pagayatan ti Dios, insuro ni Apo Jesucristo ti maysa kadagiti kinapudno a rumbeng a matungpal iti tao tapno makaay-ayo ken Apo Dios ken mangyeg iti tao ti pannakaisalakan:

“Ngarud nagsao a manen ni Jesus: Amin a kinapudno nga ibagak kadakayo. Siak ti ruangan ti pagapunan dagti karnero. … Siak ti ruangan; siasinnoman a sumrek iti uneg ti arban baeten kaniak ket maisalakanto. …” (Juan 10:7, 9 naipatarus manipud iti Revised English Bible)

Ti tudtudoenna nga arban a rumbeng a serkan wenno pakitimpuyugan ket awan sabali no di ket ti Iglesia Ni Cristo (Aramid 20:28 Lamsa Translation). Isu nga iti daytoy a panawen, magun-od ti tao ti pannakikadua ti Dios no miembro isu ti pudno nga Iglesia Ni Cristo. Ngem saan a basta miembro laeng no di ket masapul a saan a sumina iti panagtulnog iti Dios ken kanayon nga aramidenna ti makaay-ayo Kenkuana.

Tarigagayan ken ikagumaantayo a magun-od ti kanayon a pannakikadua ni Apo Dios. Tapno matungpal dayta, masapul a paneknekantayo a naan-anay ti ayattayo Kenkuana babaen ti naimpapusoan a panangtulnog kadagiti bilinna (I Juan 5:3), karaman ti panagmiembro iti Iglesia Ni Cristo.