Dakkel ti pakainaigan ti nalinteg a panagbiag iti imatang ni Apo Dios tapno sagrapen dagiti adipenna dagiti paraburna. Kastoy iti nailanad iti Biblia:

“Ti lunod ti Apo ket adda iti pagtaengan ti dakes, ngem parparaburan na ti pagtaengan ti nalinteg.” (Kaw. 3:33 npv)

Kayat ti Dios a nalintegtayo tapno magun-odtayo ken ti pamiliatayo dagiti paraburna. Ania pay ti nakasagana nga aramiden ni Apo Dios kadagiti nalinteg?

“Dagiti nalinteg salakniban ti APO ida, ket denggenna ti asugda … Umawag dagiti nalinteg iti APO ket dagus nga ipangagna ida; tulonganna ida kadagiti amin a pakarigatanda.” (Salmo 34:15, 17 Ti Baro a Naimbag a Damag Biblia)

Iti daytoy pay laeng a biag ket magungonaantayon no addaantayo ti kastoy a talunggading agsipud ta ti nalinteg ket salakniban ti Dios, denggenna no umawag wenno agkararag, ken isalakanna kadagiti amin a pakarigatanda. Ti adipen ti Dios a nalinteg ket agbibiag iti pammati:

“Ngem ti nalinteg agbiagto gapu iti pammati: ket no isu agsanudto saanto a maayayo toy cararuac  kenkuana.” (Heb. 10:38)

Ti agbibiag iti pammati ket ibibiagna ti pammati ni Cristo (Gal. 2:20). Isu nga ikutna ti panunot ni Apo Jesucristo, ti kinatulnog iti pagayatan ti Dios aginggana ken patay (Filip. 2:5, 8). Ti nalinteg nga adipen ti Dios ket addaan nasantoan a panagbuteng iti Apo:

“Isu a nalinteg iti dalanna agbuteng iti Apo, ngem isu a nakillo kadagiti daldalanna ket manglaklaksid Kenkuana.” (Kaw. 14:2 npv)

Ti addaan ti nasantoan a panagbuteng iti Dios ket likliklikanna ti dakes:

“Gapu ti caasi ken kinapudno mapacawan ti kinadakes; ket gapu ti panagbuteng ken ni Apo dagiti tattao liklikanda ti dakes.”  (Prov. 16:6)

Aramidentayo a pagannurutan iti biagtayo ti kinalinteg ken kinatulnog kadagiti bilbilin ti Dios tapno kanayontayo a makaipaay ti dayag Kenkuana, iti kasta ket magun-odtayo ti nawadwad a paraburna.