AN SARO SA MGA BERSIKULO kan Bibliya na nagpapatotoo kan importansiya asin pangangaipo sa paglaog sa Iglesia ta nganing maresibe an pagliligtas kan Kagurangnan na si Jesukristo iyo idtong nakasurat sa Juan 10:9. Sa enot na parte kan bersikulo—na duman pigsabi ni  Kristo  na, “Ako an tata [puwertahan], an siisay man na maglaog sa paagi ko maliligtas”—pigsasabi an Saiyang panuga na maliligtas an mga minalaog sa Saiya, an boot sabihon, idtong mga nakalaog sa aripompon, na mayong iba iyo an Iglesia Ni Cristo (Juan 10:7; 10:9 Revised English Bible; Guibo 20:28 Lamsa Translation, Binikol).

Alagad, sa iba bakong klarado an manungod sa boot sabihon sa huring parte kan Juan 10:9—“… asin malaog asin maluwas, asin makakakua nin sabsaban.” An iba pigsasabot  ini na may kaibahan na pamimilosopo: an rason daa kun tano ta pigsasabi na, “naglalaog asin nagluluwas, asin makakakua nin sabsaban” por dahil  an mga naglaog ki Cristo yaon sa toril asin kaipuhan na iluwas tanganing pasabsabon, arog daa kan sarong literal na aripompon nin mga karnero. An iba man na mga kritiko kan Iglesia Ni Cristo nagsasabi: kun an paglaog na sinasabi sa enot na parte kan bersikulo iyo an paglaog sa Iglesia Ni Cristo, kun siring an pagluwas daa na sinasabi iyo man an pagluwas sa Iglesia Ni Cristo ta nganing makahanap nin sabsaban. An saindang konklusyon: an mga naglaog daa sa Iglesia Ni Cristo kaipuhan na  magluwas digdi tanganing maligtas.

Ano an sala kan siring na interpretasyon? Minalataw na an Kagurangnan na si Jesukristo  an nagkokontra sa kun ano an Saiya mismong ipigpahayag. Sa sarong lado pigsasabi  Niya na an siisay man na maglaog sa Saiya maliligtas; sa ibong na lado, an iba pigpapalataw na pigsasabi Niya na kaipuhan an maglaog dangan pagkatapos kaipuhan an magluwas . Imposible! Si Cristo dai nanggad mataram nuarin pa man nin pandadaya o kaputikan (I Ped. 2:21). Mayo man Siyang ipinangadal na kaipuhan magluwas sa Iglesia tanganing maligtas. Imbes pa ngane, sinabi Niya na an mapasuhay sa Saiya o sa Saiyang hawak o sa Iglesia (Col. 1:18) siring sa sarong sanga na nasuhay sa puon—maaalang, titipunon, asin i-aapon sa kalayo o sa daing kasagkoran na padusa (Juan 15:5; Kap. 21:8).

Kun siring, ano an itinatao kan Bibliya na boot sabihon kan huring kabtang kan Juan 10:9? Susog sa Kagurangnan na si Jesukristo, an mga tawong nagralaog sa Saiya na pinanugaan Niya na maliligtas igwa nin lalaogan, asin pagluwas ninda duman makakahanap sinda nin sabsaban.

Saen baya nakatagamang manlaog bako sana an mga miyembro na kan Iglesia Ni Cristo alagad an gabos na tawo? Sa Isaias 38:10 arog kaine an pigsasabi:

“Pigsabi ko na sa katapusan kan sakong mga aldaw, Malaog ako sa mga puwertahan kan lolobngan: Dae na sakuya ipigtao an natatada ko pa na mga taon.” (King James Version, ipigliwat na hale sa Ingles)

An gabos na tawo nakatagama na na maglaog sa lolobgan o magadan. Asin kun pano na pinag-boot ning Diyos sa mga tawo an kagadanan, “pakatapus kaiyan an paghokom” (Heb. 9:27 An Biblia). Alagad, an kalamangan  kan mga naglaog ki Cristo o nagin miyembro sa saiyang Iglesia sigurado na senda na maluwas sa lolobngan asin makakakua nin sabsaban huli ta sineguro ni Cristo na an Saiyang Iglesia dai madadaog kan kapangyarihan nin kagadanan:

“Asin sinasabihan taka, ika si Pedro, asin sa ibabaw kan gapong ini papatindogon ko an sakong iglesia, asin dai iyan madadaog kan mga trangkahan nin kagadanan.” (Mat. 16:18 Magandang Balita Biblia, Binikol hale sa Tagalog)

Ini an boot sabihon kan pigsabi kan Kagurangnan na si Jesukristo sa Juan 10:9. An mga minalaog sa Saiya o sa mga miyembro kan Iglesia Ni Cristo iyo an mga pinanugaan Niya nin kaligtasan, maglaog man senda sa lolobngan o magadan alagad “maluwas” man sinda hale duman o mabubuhay liwat. Mangyayari ine sa Saiyang Ikaduwang Pagdatong:

“Huli ta an Kagurangnan man sana mahilig hale sa lagñit, kaiba an kinurahao, kaiba an tigñog kan arcangel, asin kaiba an trompeta nin Dios: asin an magña gadan dian ki Cristo maburuhat na enot.” (I Tes. 4:16 ab)

Tano man ta pigsabi na an mga nasa aripompon o Iglesia Ni Cristo na minalaog asin minaluwas sa lolobngan “makakakua nin pasabsaban”?

Igwa nin duwang klase na pagkabuhay-liwat—an enot iyo an pasiring sa buhay na daing kasagkoran asin an saro iyo an pasiring sa paghokom o daing kasagkoran na padusa: “… huli ta maabot an oras na an gabos na nasa lolobgñan makakadagñog kan saiyang tigñog, Asin magruruluas; an magña nagguiribo nin marahay, magbuburuhat liwat sa buhay, asin an magña nagguiribo nin maraot, sa silot” (Juan 5:28–29 ab).

An mga ki Cristo eyu an kaibahan sa enot na pagkabuhay-liwat asin dadarahon Niya tanganing mag-erok sa Banal na Siyudad, sa bagong langit asin daga (I Tes. 4:16–17; Kap. 21:1–4). Kun siring, sa pagkabuhay-liwat dai na sinda magugutom, mapapaha, o magagadan nin huli ta si Cristo, na iyo an saindang pastor, iyo an madara sainda o ma pastor sainda sa mga burabod kan tubig nin buhay (Kap. 7:16–17). Ini an sabsaban na matutuparan ninda sa Banal na Siyudad na ipinanuga nin Dios sa Saiyang mga pinili.