Ang isa sa mga sitas sang Biblia nga nagapamatuod nga importante kag kinahanglan ang pagsulod sa Iglesia agud maangkon ang pagluwas sang Ginoong Jesu-Cristo amo ang nakasulat sa Juan 10:9. Sa nahauna nga bahin sang bersikulo—nga dira ginsiling ni Cristo nga “Ako ang ganhaan; ang bisan sin-o nga magsulod sa panong pinaagi sa akon maluwas siya”—ginpahayag Niya nga maluwas ang mga nagsulod sa Iya, nga nagatumod, sa mga nagsulud sa panong, nga wala sang iban kundi ang Iglesia Ni Cristo (Juan 10:7; 10:9 Revised English Bible; Binuhatan 20:28 Lamsa Translation ginbadbad sa Hiligaynon).

Apang, indi nagin maathag para sa iban ang buot silingon sang ulihi nga bahin sang sitas nga Juan 10:9—“kag magasulud kag magagowa, kag makakita sing halalbon.” May iban nga ginapakahulugan ini nga may pamilosopo pa: Amo gani kuno nga ginsiling “magasulod kag magagowa, kag makakita sing halalbon” kay yara na sa sulod sang panong ang mga nagsulod kay Cristo kag kinahanglan pa nga paguwaon para matatapan sa halalbon kapareho kuno sa ginahimo sa literal nga panong sang karnero. Ang siling naman sang iban nga nagapakamalaut sa Iglesia Ni Cristo: kun ang pagsulod nga ginatumod sa nahauna nga bahin sang sitas amo ang pagsulod sa Iglesia Ni Cristo, kun amo, ang pagguwa kuno nga ginatumod amo ang paggowa sa Iglesia Ni Cristo para  makaangkon sang halalban. Ang konklusyon nila: ang mga nagsulod sa Iglesia Ni Cristo kinahanglan kuno nga maggowa man para maluwas.

Ano ang sayop sa ila nga paghangop? Magagowa nga ginakontra sang Ginoong Jesu-Cristo ang Iya mismo nga gintudlo. Sa una nga bahin ginhambal Niya nga ang magsulod sa Iya maluwas; apang sa sunod nga bahin, ginapagowa sang iban nga daw ginatudlo ni Cristo nga kinahanglan magsulod anay kag pagkatapos kinahanglan maggowa. Imposible! Si Cristo san-o pa man indi magahambal sang limbong ukon sang binutig (I Ped. 2:21). Wala man Siya sang ginatudlo nga kinahanglan maggowa sa Iglesia para maluwas. Kundi, ginhambal pa gani Niya nga ang mahamulag sa Iya ukon sa Iya lawas ukon sa Iglesia (Col. 1:18) pareho sa sanga nga nahamulag sa puno—nagakalaya, ginatipon, kag ginadap-ong sa kalayo ukon sa walay katapusan nga silot (Juan 15:5; Apoc. 21:8).

Ano, kun amo, ang ginahatag sang Biblia nga kahulugan sang katapusan nga bahin sang Juan 10:9? Suno sa Ginoong Jesu-Cristo, ang mga tawo nga nagsulod sa Iya nga Iya ginsaaran nga maluwas may ara sang kinahanglan nga sudlan, kag sa paggowa nila makaangkon sila sang halalban.

Sa diin bala gintalana nga magsulod, indi lamang ang mga nangin katapo na sa Iglesia Ni Cristo kundi mangin ang tanan nga tawo? Sa Isaias 38:10 amo sini ang ginasiling:

“Nagsiling ako: “Magasulod ako sa mga gawang sang Lulubngan Sa tungatunga sang akon kabuhi. Kuhaon sa akon ang nabilin ko nga mga tinuig.” (Bag-ong Kalibutan nga Badbad sang Balaan nga Kasulatan 2014 nga Edisyon)

Ang tanan nga tawo gintalana nga magsulod sa lulubngan ukon mapatay. Kag kun paano nga gintagnaan sang Diyos ang mga tao sang kamatayon, “kag sa tapus sina ang paghukom” (Heb. 9:27). Apang, ang bentaha sang mga nagsulod kay Cristo ukon nangin katapo sa Iya Iglesia sigurado gid nga magagowa sila sa lulubngan kag makaangkon sang halalban bangud ginpat-od ni Cristo nga indi makadaog sa Iya Iglesia bisan ang gahom sang kamatayon:

“Kag tungod sini ginatawag ko ikaw nga Pedro, nga kon sayuron ‘bato.’ Kag sa sini nga bato pagatukuron ko ang akon iglesya,  kag bisan ang gahom sang kamatayon indi makadaog sa iya. “ (Mat. 16:18 Ang Pulong Sang Dios)

Amo ini ang kahulugan sang ginsiling  sang Ginoong Jesu-Cristo sa Juan 10:9. Ang mga nagsulod sa Iya ukon ang mga nangin katapo sa Iglesia Ni Cristo ang ginsaaran Niya sang kaluwasan, “magsulod” man sila sa lulubngan, “magagowa” man sila gihapon dira ukon mabanhaw. Matabo ina sa Iya ikaduha nga pag-abot:

“Kay ang Ginoo gid magakunsad gikan sa langit nga may singgit sang pagmando, sa tingug sang puno nga manugtunda, kag sa budyong sang Dios. Kag ang mga napatay kay Cristo mabanhaw sing una;” (I Tes. 4:16 Ang Biblia-Hiligaynon)

Ngaa bala ginsiling nga ang mga yara sa panong ukon Iglesia Ni Cristo nga magasulod kag magagowa sa lulubngan “makakita sang halalban”?

May duha ka klase sang pagkabanhaw—ang una, padulong sa kabuhi nga wala sing katapusan, kag ang isa pa, padulong sa paghukom ukon sa walay kataposan nga silot: “kay magaabot ang tion nga ang tanan nga patay makabati sang akon pulong, kag magaguwa sila sa ila lulubngan. Ang mga tawo nga naghimo sing maayo banhawon kag hatagan sing kabuhi nga wala sing katapusan, kag ang mga tawo nga naghimo sing malain banhawon man pero silutan.” (Juan 5:28–29 apd)

Ang mga kay Cristo amo ang kaupod sa una nga pagkabanhaw, kag sila ang pagadal-on Niya sa pagpuyo sa Banwang Balaan, sa bag-o nga langit kag bag-o nga duta. (I Tes. 4:16–17; Apoc. 21:1–4).

Gani, sa pagbanhaw, indi na sila paggutumon, ukon paga-uhawon pa, ukon mapatay pa, bangud si Cristo nga ila mangin pastor ang magabantay sa ila kag magatuytoy sa sila sa mga tuburan sang tubig nga nagahatag sang kabuhi (Apoc. 7:16–17). Amo ini ang halalban nga maangkon nila sa Banwang Balaan nga ginsaad sang Dios sa Iya mga ulipon.

Kun amo, maathag nga sa Juan 10:9 nakasulat ang ginsaad ni Cristo nga kaluwasan sa mga nagsulod sa Iya ukon nangin katapo sa Iglesia Ni Cristo. Magasulod sila kag magagowa sa lulubngan—mapatay man apang pagabanhawon—kag magapuyo sa Banwang Balaan,  nga didto ginatuytuyan sila sa mga tuburan sang tubig nga nagahatag sang kabuhi – ang “palahalban nga bugana”  (Salmo 23:2 apd) nga ila gid ginahandom.