TI MAYSA KADAGITI BERSIKULO ti Biblia a mangpanpaneknek a napateg ken kasapulan ti iseserrek iti Iglesia tapno magun-od ti panangisalakan ni Apo Jesucristo ket ti nakasurat iti Juan 10:9. Iti umuna a paset ti bersikulo—nga idiay ket insuro ni Cristo a, “Siak ti ruangan; ti siasinoman a tao a sumrek kaniak, ket maisalakanto”—ket nakalanad ti karina a maisalakanto dagiti nakastrek Kenkuana, isu ngarud, dagiti naitimpuyog iti arban, nga awan sabali no di ket ti Iglesia Ni Cristo (Juan 10:7; 10:9 Naiallison manipud iti Revised English Bible; Gawa 20:28 Naiallison manipud iti Lamsa Translation).

Numanpay kasta, saan a nalawag kadagiti dadduma ti maudi a paset ti bersikulo ti Juan 10:9—“… ken sumrek ken rumuar, ken makasapol ti pagaraban.” Adda ti dadduma a ti pannakaawatda ditoy ket adda laokna a papilosopo: no apay kano a nakalanad “sumrek ken rumuar, ket makasapol ti pagaraban” ket gapu ta adda iti uneg iti arban dagiti nakastrek kenni Cristo ken kasapulan a mairuar tapno makaarabda, a kas ti maar-aramid iti literal nga arban ti karnero. Kuna met dagiti dadduma a mangbabbabalaw iti Iglesia Ni Cristo: no ti iseserrek a tudtudwenna iti umuna a paset ti bersikulo ket ti panagmiembro iti Iglesia Ni Cristo, nu kasta ngarud, ti iruruar kanu a tudtudwenna ket ti iruruar  iti met laeng Iglesia Ni Cristo tapno makasarak ti pagaraban. Ti konklusionda, dagiti nakastrek iti Iglesia Ni Cristo ket rumbeng kano a rumuar ditoy tapno maisalakan.

Ania ti kamali iti kastoy a panangipapan? Lumgak a kasla konkontraen ni Apo Jesucristo ti mismo nga impannayagna. Iti maysa a bangir ket ibagbagana a ti sumrek Kenkuana ket maisalakanto; iti sabali a bangir met ket ipalpalgak dagiti dadduma nga ibagbagana a kasapulan a sumrek ken kalpasanna ket rumuar. Imposible! Kaanuman ket saan nga agsao ni Cristo ti panangallilaw ken kinaulbod (I Ped. 2:21).   Awan met ti insurona a rumbeng a rumuar iti Iglesia tapno maisalakan. No di ket, imbagana pay ngarud nga ti maisina Kenkuana wenno iti bagina wenno Iglesia (Col. 1:18) ket kasla sanga a naisina iti puon—magango, maurnong, ken maibellengto iti apoy wenno ti pannakadusa nga awan inggana (Juan 15:5; Apoc. 21:8).

Ania ngarud, ti it-ited ti Biblia a kaiulogan ti maudi nga paset ti Juan 10:9? Sigun ken ni Apo Jesucristo, dagiti tao a nakastrek Kenkuana a nangikarianna a maisalakanto ket adda sumrekanda, ken no rumuarda idiay ket makasapolda ti pagaraban.

Sadino a naikeddeng a sumrek saan laeng dagiti naitimpuyog iti Iglesia Ni Cristo no di ket uray dagiti amin a tattao? Iti Isaias 38:10 ket kastoy ti kunana:

“Kinunak iti pannakaugsot dagiti alaldawko, Sumrekakto kadagiti ridaw ti tanem: Napaidamanak kadagiti mabatbati a tawenko.” (King James Version, naialison manipud iti Ingles)

Amin a tao ket nakedngan a sumrek iti tanem wenno matay. No kasano nga intuding ti Dios iti amin a tao ti ipapatay, “malpas daytoy ti pannakaokom” (Heb. 9:27). Numanpay kasta, ti bentaha dagiti nakastrek ken ni Cristo wenno timmimpuyog iti Iglesiana ket piho a rumuardanto iti tanem ken makasapoldanto ti pagaraban gapu ta piniho ni Cristo a ti Iglesiana ket saan a pagballigian ti pannakabalin ti ipapatay:

“Ibagak ngarud kenka, sika ket Pedro, iti rabaw daytoy a bato ket bangonekto ti iglesiak, ket dinto agballigi kenkuana uray ti pannakabalin ti ipapatay.”  (Mat. 16:18 Ti Baro a Naimbag a Damag Biblia)

Daytoy ti kaiuloganna ti kinuna ni Apo Jesucristo idiay Juan 10:9. Dagiti nakastrek Kenkuana wenno dagiti miembro iti Iglesia Ni Cristo ti nangikarianna ti pannakaisalakan, “sumrekda” man iti tanem ngem “rumuarda” met laeng idiay a disso wenno mapagungardanto. Mapasamak daytoy iti Maikadua nga Iyaayna:

“Ta ti Apo met laeng aggapunto sadi langit a buyugen ti ariwawa, ti timec ti arcangel ken ti trompeta ti Dios, ket dagiti natay ken Cristo bumangondanto nga umuna.” (I Tes. 4:16).

Apay kinuna met a dagiti adda iti arban wenno Iglesia Ni Cristo a sumrek ken rumuar iti tanem ket “makasapol ti pagaraban”?

Adda ti dua a klase ti panagungar—ti umuna ket para iti biag nga awan inggana ken ti maysa pay ket para iti pannakaokom wenno awan inggana a pannakadusa: “… ta umay ti oras a dagiti amin nga adda cadagiti tanem mangngegdanto ti timecna, Ket rummuardanto: dagiti nagaramid ti naimbag, iti panagungar ti biag; ken dagiti nagaramid ti dakes, iti panagungar ti pannacaocom.” (Juan 5:28–29).

Dagiti ken Cristo ket karaman iti umuna a panagungar ken isuda ti ikuyogna tapno agyan idiay Nasantoan nga Ili, idiay baro a langit ken daga (I Tes. 4:16–17; Apoc. 21:1–4). Ngarud, iti panagungar nga balbaliw ket didanton a mabisin, mawaw, wenno matay gapu ta ni Cristo, nga agbalin a pastorda, ket iturongnanto wenno ipastorannanto ida saddiay ubbog ti danum ti biag (Apoc. 7:16–17). Daytoy ti pagaraban a masarakanda idiay Nasantoan nga Ili nga ingkari ti Dios kadagiti pinilina.

No kasta ngarud, nalawag nga idiay Juan 10:9 ket nakalanad ti kari a panangisalakan ni Cristo kadagiti nakastrek Kenkuana wenno nakitimpuyog iti Iglesia Ni Cristo. Sumrek ken rumuarda iti tanem—matayda ngem agbiagda a balbaliw—ken agnaeddanto idiay Nasantoan nga Ili nga idiay ket maiturongda iti ubbog ti biag—ti “nalasbang a pagaraban” (Salmo 23:2) a namnamaenda unay.