ING METUNG KARENG TALATA ning Biblia a magpatune a maulaga at kailangan ing pamaglub king Iglesia ban atanggap ing pamagligtas ning Ginung Jesucristo itang makasulat  king Juan 10:9.  King mumunang dake ning talata—a karin nganang Cristo, “Aku ing pasbul; uli ku nung ninumang lungub, miligtas ya”—sasabian Ne ing Kayang pangaku a miligtas la reng linub Keya, detang linub king kawan, a alang aliwa nune ing Iglesia Ni Cristo (Juan 10:7; 10:9 Revised English Bible; Ding Dapat 20:28 Lamsa Translation).

Oneng, ali malino kareng aliwa ing kabaldugan ning tauling dake ning talatang Juan 10:9—“at lungub ya, at lual ya, at manakit yang pagpastulan.” Ating aliwa na ing babie dang kabaldugan keni, ating alung pamilosupu: inya kanu sinabing “lungub ya at lual ya, at manakit yang pastulan” uling atyu la king kilub ning kulungan deng linub kang Cristo at kailangan lang ilual ban a pastulan la, kalupa kanu ning gagawan keng litiral a kawan ning tupa.  Sasabian da naman deng aliwang manuligsa king Iglesia Ni Cristo: nung ing pamaglub na amanuan king mumunang dake ning talata ya pin ing pamaglub king Iglesia Ni Cristo, nung makanian, ing paglual a amanuan kanu ya ing paglual mu rin king Iglesia Ni Cristo ban manakit pastulan. Ing konklusyun da: reng linub king Iglesia Ni Cristo dapat lang lumual keta ban miligtas.

Nanu ing kamalian na ning makanitang kabaldugan? Lunto a sasalungatan neng Ginung Jesucristo ing mismung sinabi Na. Keng metung a banda sasabian Nang ing lungub Keya miligtas ya; keng metung a banda naman, papalto da reng aliwa na sasabian Na a kailangan ing lungub at kaybat lumual.  Imposibli! Ali ya kapilan man magsalitang kapamiraitnan o kalaraman i Cristo (I Ped. 2:22). Ala Yang tiru a sukat lumual king Iglesia ban miligtas.  Nune, sinabi Na pa pin a ing mikawani Keya o keng Keyang katawan o Iglesia (Col. 1:18) kalupa na ning sanga a mikawani keng tanaman—lalangi, titipunan, at yuyugse king api o king parusang alang angga (Juan 15:5; Apoc. 21:8).

Nung makanian, nanu ing babie ning Biblia a kabaldugan ning tauling dake ning Juan 10:9? Agpang king Ginung Jesucristo, deng taung linub Keya a pengakuanan Nang miligtas, atin lang luban, at paglual da ka rin manakit lang pastulan.

Nokarin la wari makasadiang lungub, ali mu deng inanib king Iglesia Ni Cristo, nune pati deng heganaganang tau? King Isaias 38:10, ini ing sasabian:

“Sinabi ku, King karatunan da ding kanakung aldo lungub ku karing pasbulan ning pikutkutan. Kebawasnan ku karing labis da ding kanakung banua.” (King James Version, sinalin ibat king Ingles)

Makasadia la reng heganaganang tau a lungub king pikutkutan o mate. At nung makananu telaga ning Dios kareng tau ing kamatayan, “at kaibat na niti tuki na ing pamanukum” (Heb. 9:27). Oneng, ing igitan da reng linub kang Cristo o inanib king Keyang Iglesia, siguradu a lumual la king pikutkutan at manakit lang pastulan uling siniguradu nang Cristo a ing Keyang Iglesia e ne daigan ning upaya ning kamatayan:

“At aku sasabian ku keka, ika i Pedro at babo na niting batu italakad ke ing iglesia ku. At e re sambutan ding pasbul ning impierno.” (Mat. 16:18 Inga Mayap a Balita Biblia)

Ini ing kabaldugan ning sinabi nang Ginung Jesucristo king Juan 10:9. Deng linub Keya o deng miembru ning Iglesia Ni Cristo ing pengakuanan Nang kaligtasan, “lungub” la man king pikutkutan, “lumual” la mu rin ka rin o mabie lang pasibayu. Marapat ini keng Keyang Pangaduang Pamaniatang:

“Uling ing Ginu kahud yang kuldas ibat banua, maki metung a gulisak king siwala ning arcangel, at king pakakak ning Dios at din mete kang Cristo talakad lang muna,” (I Tes. 4:16)

Obat naman sinabing deng atiu king kawan o Iglesia Ni Cristo a lungub at lumual king pikutkutan “manakit lang pastulan”?

Atin aduang klasi ning pamanyublingmie—ing mumuna king bie a alang angga at ing metung pa king kayatulan o alang anggang parusa: “… uling datang ing oras a ding anggang atiu king kutkutan damdaman da ing siwala na. At lual la, ding dinapat mayap, king pangasubli nang pasibayu ning bie; at ding dinapat marok, king pangasublingmie king kayatulan” (Juan 5:28–29).

Deng kang Cristo kayabe la keng mumunang pangasublingmie at ila ing dalan Na ban manuknangan king Banal a Ciudad, king bayung banua at bayung yatu (I Tes. 4:16–17; Apoc. 21:1–4).  Inya, king pangasublingmie, e no dumanup, kumau, o mate man, uling i Cristo a maguing pastul da, patnubayan nalang paike karing bukal ding danum ning bie (Apoc. 7:16–17). Ini ing pastulan a akit da king Banal a Ciudad a pengaku ning Dios kareng Keyang pinili.

Keya, malino a makasulat king  Juan 10:9 ing pangaku nang Cristo a kaligtasan kareng linub Keya o inanib king Iglesia Ni Cristo.  Lungub la at lual king pikutkutan—mate oneng mie pasibayu—at manuknangan king Banal a Ciudad a karin patnubayan nalang paike karing bukal ding danum ning bie—ing “saguiwang pastulan” (Ding Dalit 23:2) a karelang binang pignasan.