IPIGPAPAMIDBID KAN BIBLIA an duwang magkalaen na klase nin tawo asin an saindang magkalaen na destinasyon.  An sarong klase iyo an matanos, asin an saro iyo an maraot:

“Siya na matanos sa saiyang lakaw natatakot sa Kagurangnan, alagad siya na biko an saiyang lakaw minabaya saiya.” (Mga Talinhaga 14:2 Bagong Bersyon sa Pilipino)

“An tawong yaon sa matanos nakakakua nin buhay, alagad an dalan kan maraot pasiring sa kagadanan.” (Mga Talinhaga 11:19 Marahay na Bareta Biblia)

An pagbuhay nin biko o maraot pasiring sa kagadanan o kapahamakan, alagad an tawong nabubuhay nin matanos makakakua nin buhay.

Habo niatong mapahamak, kaya ngani pighihingowa niatong makakua nin kaligtasan asin buhay na mayong kasagkoran sa Aldaw nin Paghukom. Kun siring, pursigehon niato an matanos na pagbuhay dawa pa ngani padagos na naggagrabe asin naglalakop an kara’tan sa kinaban. Pa’no niato ini magigibo?

• Ipamuhay niato an mga katukdoan nin Dios na Saiyang itinutukdo sa paagi kan mga tinaw’an Niya nin awtorisasyon na mangadal (II Juan 1:9; Juan 14:21 asin 23 MB).
• Dai kita maggi’bo nin anoman na maraot o kontra sa katukdoan nin Dios (Roma 6:1-2 asin 12-15 MB).
• Dawa kita nasa kasakitan o kadipisilan, dai niato pag-arogon an mga tawong naggigibo nin maraot na an sarahotan “an tawong nasa kasakitan, dawa sa tarom nagkakapot.” Halimbawa, tangani’ sanang makaluwas sa kadipisilan, naghahab’on o naggigibo nin mga ilegal na gibo (Isa. 55:7 MB).
• Maghingoa kita na mabuhay susog sa kabobot’an nin Dios na igwang pagpopogol sa sadiri (self-control) asin dai piggigibo anoman na gusto niato dawa maraot. Dai man kita dapat magpadali-dali sa satong mga gibo asin dai nasusugotan nin mga salang gibo (Tito 2:12).
• Mamibe’ kita nganing maghagad nin tabang sa Mahal na Dios. Sa paagi kaini maikukonsulta niato Saiya an satong mga plano tanganing dai kita masala’ sa satuyang mga desisyon (Marcos 11:24; Salmo 145:18 MB).

Giromdumon niato na, nakahiling an ‘’KAGURANGNAN sa gabos na lugar, pirmi siyang nagbabantay sa mga maraot asin sa mga tawong marahay” (Mga Talinhaga 15:3 NIV, Ipigliwat sa tataramon na Bikol). Kun siring, padagos niatong gibohon an itinotokdo kan Biblia na mabuhay segun sa mga adal nin Dios.