IPABIGBIG TI BIBLIA ti dua nga agduma a kita ti tao ken ti agduma a pagtungpalanda. Ti maysa a kita ket ti nalinteg ken ti maysa pay ket ti nadangkes.

“Ti nalinteg iti dalanna agbuteng iti Apo, ngem ti killo dagiti dalanna ket laksidenna Isu.” (Kaw. 14:2   Naipatarus manipud iti New Pilipino Version)

“Ti tao nga adda iti nalinteg ket makasarak iti biag, Ngem ti dana ti nadangkes ket agturong iti ipapatay.” (Kaw. 11:19 Naipatarus manipud iti Magandang Balita Biblia)

Ti agbibiag ti kinakillo wenno kinadakes ket agturong iti ipapatay wenno pannakadadael, idinto a ti tao nga agbibiag a nalinteg, masarakanna ti biag.

Ditay kayat ti maisagmak, no di ket tarigagay tayo a magun-od ti pannakaisalakan ken ti biag nga agnanayon inton Aldaw ti Panangukom.  Isu nga itandudotayo  ti nalinteg a panagbiag uray no kumarkaro ken agsaknap ti kinadangkes ditoy lubong. Kasanotayo a maaramid daytoy?

• Ibiagtayo dagiti adal ti Dios nga isursurona babaen kadagiti inikkanna ti karbengan a mangaskasaba (II Juan 1:9; Juan 14:21 ken 23 mb).
• Saantayo nga agaramid ti aniaman a kinadakes wenno maisuppiat kadagiti adal ti Dios (Roma 6:1-2 ken 12-15 mb).
• Uray no adda tayo iti pakarigatan wenno kinapanglaw, saantayo a tuladen dagiti tao nga agar-aramid iti dakes a ti rasonda: “Ti agrigrigat a tao, kumpet uray iti immuko.” Kas pagarigan, tapno laeng makalung-aw iti kinapanglaw ket agtakaw wenno makiraman iti aramid nga ilegal (Isa. 55:7 mb).
• Ikagumaantayo ti agbiag a mayannurot iti pagayatan ti Dios a buyogen ti panagteppel (self-control) ken saan nga aramiden ti aniaman a magustuan uray no dakes. Saan met a rumbeng nga  agdarasudos nga agaramid ken saan a paallukoy kadagiti aramid a nakillo (Tito 2:12).
• Agkararagtayo tapno dumawat iti tulong iti Dios. Babaen met daytoy ket maiyumantayo Kenkuana dagiti planotayo tapno saantayo nga agkamali kadagiti desisiontayo (Mar. 11:24; Awit 145:18 mb).

Laglagipentayo, “Nakaimatang ti Apo iti amin a disso, kanayon a agbanbantay kadagiti dakes ken nasayaat a tattao” (Kaw. 15:3, Naipatarus manipud iti npv). Isu a kanayontayo nga aramiden ti isursuro ti Biblia nga agbiag mayannurot kadagiti adal ti Dios.