PAKILALA NE NING BIBLIA ing adwang miyaliwang uri ning tau at ing karelang miyaliwang kapalaran. Ing matulid ing metung a uri at ing e mayap ing kadua:

“Itang mabibie king katuliran ing Ginu ya ing keyang katakutan; oneng itang maglinlang ya ing lalapastangan.” (Ding Kasebian 14:2 pmpv)

“E ya mate ing ninumang taung magkapilit dapat kayapan, oneng kamatayan ing kararasan na ning taung darapat e mayap.” (Ding Kasebian 11:19 pmpv)

Ing taung mabibie king e ustu o e mayap miraras yang kamatayan o kasiran, kabang ing taung mabibie matulid manakit yang bie.

E tamu buring mate, nune pagnasan tamu ing miligtas at mika bie alang angga king Aldo ning Pamanukum. Anya, taguyud taya ing matulid a pamibiebie agya mang ing karokan patuloy yang lalala at lalaganap king yatu. Makananu taya agawa iti?

• Gawan ta la ring turu ning Dios a tuturu Na king kapamilatan da ring dininan nang karapatang manaral (II Juan 1:9 pmpv; Juan 14:21 at 23 pmpv).
• E ta gagawang nanumang e mayap o salungat kareng turu ning Dios (Roma 6:1-2 at 12-15 pmpv).
• Agyang atiu tamu king kaluluan o kasakitan, e ta la dapat pakiapusan deng gagawang e mayap na ing sangkan da “ing taung gipit, king pataram makakapit.” Alimbawa, para mu makalwal la keng kakaluluan, manako la o makiabe la king ilegal a aktibidad (Isaias 55:7 pmpv).
• Pagpilitan tamung mabie bate king kaburyan ning Dios na ating pamagpigil king sarili (self-control) at e daraptan ing nanu mang buri tamu agyang e mayap. E tamu rin dapat padalus-dalus king pamaggawa at e tamu patuksu king e ustu (Tito 2:12 pmpv).
• Manalangin tamu ban manyad saup king Dios. Kapamilatan na niti, asabi ta ya Kaya ing kekatamung planu ban e tamu magkamali king pamagpasiya (Marcos 11:24 pmpv; Ding Dalit 145:18 pmpv).

Tandanan tamu na, “Akakit na ning Ginu ing sablang malilyari nukarin man; lalawan na la ding taung darapat e mayap o mayap.”  (Ding Kasebian 15:3 pmpv). Anya, patuluy tayang gawan ing tuturu ning Biblia ban mabie tamu bate kareng turu ning Dios.