Igpadayon an matadong nga panginabuhi
Igpadayon an matadong nga panginabuhi
La Biblia enseña sobre una sola verdadera Iglesia y cuyo nombre es “Iglesia De Cristo,” que es profetizada, y cree que solamente el Padre es el Dios verdadero
Por ROMMEL V. SAN PEDRO
IGINPAPAKILALA HAN BIBLIA an duha nga magkalain nga klase hin tawo ngan an magkalain liwat nira nga hingaradtuan. An usa nga klase amo an matadong ngan an usa pa amo an maraot:
“Hiya nga matadong ha iya paglakat may pagkahadlok ha GINOO, pero hiya nga baliko an dalan nagsasalikway ha Iya.” (Kaw. 14:2, Iginbalhin ha Waray-waray nga yinaknan tikang ha New Pilipino Version)
“An tawo nga matadong an makakabiling hin kinabuhi, pero an dalan han maraut tipakadto ha kamatayon” (Kaw. 11:19, Iginbalhin ha Waray-waray nga yinaknan tikang ha Magandang Balita Biblia)
An nabubuhi nga baliko o maraot tipakadto ha kamatayon o kakaraotan, pero an tawo nga nabubuhi hin matadong an makakabiling han kinabuhi.
Nadiri kita nga maghikaraot, kondi karuyag naton makarawat an katalwasan ngan an kinabuhi nga waray kataposan ha Adlaw han Paghuhukom. Sanglit, igpadayon naton an matadong nga kinabuhi bisan pa padayon nga natikaraot ngan natikadamo an karautan ha kalibutan. Paunan-o naton ini mahihimo?
- Igkinabuhi naton an mga pulong han Diyos nga igintututdo Niya pinaagi han mga gintagan hin katungod magtutdo (II Juan 1:9; Juan 14:21 ngan 23 mb).
- Ayaw kita paghimo hin bisan ano nga maraut o supak ha mga pulong han Diyos (Roma 6:1-2 at 12-15 mb).
- Bisan kita ada ha kagipitan o kakurian in ayaw naton subdi an mga tawo nga naghihimo hin maraut nga an ginrarason “An tawo nga nagigipit, bisan ha matarom nakap’yot”. Pananglitan, para la makasalbar ha kakurian in nangangawat o nakikigbahin ha mga ilegal nga buruhaton (Isa. 55:7 mb).
- Panglimbasogan naton mabuhi nga uyon ha kaburot-on han Diyos nga mayda pagpupugong ha kalugaringon (self-control) ngan diri bubuhaton kon ano la an karuyagon bisan maraot. Diri liwat angay nga paturutigda ha pagbuhat ngan diri nauyon ha mga baliko nga binuhatan (Tito 2:12).
- Pag-ampo kita para mangaro hin bulig ha Diyos. Pinaagi liwat hini, naihaharani naton ha Iya an aton mga plano para diri kita magsayop ha aton mga desisyon. (Mar. 11:24; Awit 145:18 mb).
Hinumdumi naton nga. “Nagkukulaw an Ginoo ha ngatanan nga dapit, pirme Hiya nagbabantay ha mga maraut ngan maupay nga mga tawo. (Kaw. 15:3, Iginbalhin ha Waray-waray nga yinaknan tikang ha npv). Salit, padayon naton buhaton an igintututdo han Biblia nga mabuhi uyon han mga pulong han Diyos.
