USA HAN MGA BERSIKULO ha Biblia nga nagpapamatuod nga importante ngan kinahanglan an pagsulod ha Iglesia basi karawaton an kaluwasan han Ginoong Jesucristo amo an nakasurat ha Juan 10:9. Ha siyahan nga bahin han bersikulo—nga diin ginsiring ni Cristo nga, “Ako an ganghaan; an bisan hin-o nga tawo nga sumulod ha akon, hiya maluluwas”—iginsusumat han Iya saad nga maluluwas an mga sinulod ha Iya, kon sugad, an mga sumulod ha panon, nga waray iba kundi an Iglesia Ni Cristo (Juan 10:7; 10:9 Revised English Bible; Buhat 20:28 Lamsa Translation).

Bisan pa, diri klaro ha iba an kahulugan han urhi nga bahin han bersikulo ha Juan 10:9—“… ngan masulod ngan magawas, ngan makakabiling hin panabsaban.” May-ada iba nga an pakahulugan hini in may pagkapilosopo: tungod daw ginsiring nga “masulod ngan magawas, ngan makakabiling hin panabsaban” kay adto ha sulod han toril an mga sinulod kan Cristo ngan kinahanglan igawas basi mapanabsaban, sugad daw han ginbubuhat ha literal nga panon han karnero. May-ada liwat nasiring nga lantugi ha Iglesia Ni Cristo: kon an pagsulod nga ginsisiring ha siyahan nga bahin han bersikulo amo an pagsulod ha Iglesia Ni Cristo, kon sugad, an paggawas daw nga ginsisiring amo an paggawas liwat ha Iglesia Ni Cristo para makabiling hin panabsaban. An ira konklusyon: an mga sumulod ha Iglesia Ni Cristo kinahanglan kuno gumawas dinhi para hira maluwas.

Ano an sayop han sugad nga pakahulugan? Makikit-an nga ginkokontra han Ginoong Jesucristo an mismo nga Iya ginsumat. Ha usa nga bahin, nasiring hiya nga an sumulod ha Iya in maluluwas; ha luyo nga bahin, iginpapakita han iba nga nasiring Hiya nga an kinahanglan amo an pagsulod ngan katapos an paggawas. Imposible! Hi Cristo bisan san-o diri magyayakan nga may limbong ngan diri magbubuwa (I Ped. 2:21). Waray liwat hiya igintutdo nga kinahanglan gumawas ha Iglesia basi maluwas. Lugod, ginsiring pa ngani niya nga an mahibulag ha Iya o ha Iya lawas o Iglesia (Kol. 1:18) in sugad han sanga nga nahibulag ha puno—mauuga, titirokon, ngan iglalabog ha kalayo o ha sirot nga waray katapusan (Juan 15:5; Pah. 21:8).

Ano, kun sugad, an iginhatag han Biblia nga kahulugan han urhi nga bahin han Juan 10:9? Sumala han Ginoong Jesucristo, an mga tawo nga sinulod ha Iya nga ginsaaran nga matatalwas in may susudlon hira, ngan kon gumawas hira didto, makakakita hira hin panabsaban.

Diin ba gintakna sumulod diri la an mga umapi ha Iglesia Ni Cristo kundi pati na liwat an ngatanan nga tawo? Ha Isaias 38:10 in sugad hini an ginsisiring:

“Akon ginsiring ha pagkamatay han akon mga adlaw, Masulod ako ha mga purtahan han lubnganan: Waray na ako nakakuha han akon nahibilin nga mga tuig.” (King James Version, iginbalhin ha yinaknan tikang ha Ingles)

An ngatanan nga tawo in nakatakna sumulod ha lubnganan o mamatay. Ngan kon paunan-o igintakna han Diyos ha mga tawo an kamatayon, “sunod hini amo an paghukom” (Heb. 9:27). Bisan pa, an kalabwan han mga sinulod kan Cristo o umapi ha Iya Iglesia amo an sigurado nga magawas  ha lubnganan ngan makakabiling hin panabsaban kay ginsiguro ni Cristo nga an Iya Iglesia in diri madadaog han gahum han kamatayon:

“Ngan nasiring ako ha imo, ikaw hi Pedro, ngan ha igbaw hini nga bato pagtitindugon ko an akon iglesia, ngan diri madadaog hiya bisan han gahum han kamatayon.” (Mat. 16:18 Magandang Balita Biblia, iginbalhin ha yinaknan tikang ha Tagalog)

Amo ini an kahulugan han ginsiring han Ginoong Jesucristo ha Juan 10:9. An mga sinulod ha Iya o an mga kaapi han Iglesia Ni Cristo an ginsaadan niya hin kaluwasan, “masulod” man hira ha lubnganan, “magawas” liwat hira didto o mabubuhi utro. Mahitatabo ini ha Iya Ikaduha nga Pag-abot:

“Kay an Ginoo dara in pulong han pagsugo, upod an tingog han arkanghel ngan an budyong han Diyos, malusad tikang ha langit, ngan mahiuuna pagkabanhaw adton mga nagkamatay dida kan Cristo. (I Tes. 4:16 New Samarenyo Version)

Kay ano man nasiring nga adton mga aada ha panon o Iglesia Ni Cristo nga masulod ngan magawas ha lulubngan in “makakabiling hin panabsaban”?

Mayda duha nga klase an pagkabanhaw—an siyahan amo para ha kinabuhi nga waray kataposan, ngan an usa pa amo para ha paghukom o waray kataposan nga sirot: “…kay maabot an takna nga an ngatanan nga aada ha mga lubnganan in makakabati han iya tingog, Ngan magawas; adton naghimo hin maupay, ngadto ha pagkabanhaw para ha kinabuhi; ngan an mga naghimo hin maraot, ngadto ha pagkabanhaw para ha paghukom” (Juan 5:28–29 An Baraan Nga Kasuratan).

An mga kan Cristo in upod ha siyahan nga pagkabanhaw, ngan hira an dadad-on Niya basi mag-ukoy ha Baraan nga bungto, ha bag-o nga langit ngan tuna (I Tes. 4:16–17; Pah. 21:1–4). Salit, ha utro nga pagkabanhaw diri na hira magugutom, mauuhaw, o mamamatay pa kay hi Cristo, nga magigin ira pastor, in magpapatimangnon o magpapapanabsab ha ira ha mga burabod han tubig han kinabuhi (Pah. 7:16–17). Ini an panabsaban nga ira mabibilngan ha Baraan ng Bungto nga iginsaad han Diyos ha Iya mga pinili.

Sanglit, klaro nga ha Juan 10:9 in nakasurat an saad nga kaluwasan ni Kristo ha mga sumulod ha Iya o umapi ha Iglesia Ni Cristo. Masulod hira ngan magawas ha lubnganan—mamamatay kondi mabubuhi utro—ngan mag-uukoy ha Baraan nga Bungto nga didto papatimangnon hira ha tubig han kinabuhi—an “magrabong nga … panabsaban” (Salmo 23:2 Bag-o nga Kalibotan nga Hubad han Baraan nga Kasuratan) nga ira ginlalaoman.