ANG USA SA MGA SITAS sa Bibliya nga nagpamatuod nga bililhon ug kinahanglan ang pagsulod sa Iglesia aron madawat ang pagluwas sa Ginoong Jesucristo mao ang nahasulat sa Juan 10:9. Sa unang bahin sa sitas—nga niini nag-ingon si Cristo nga “Ako mao ang ganghaan. Kong adunay mosulod pinaagi kanako, siya maluwas”— gipahayag ang saad Niya nga maluwas ang mga misulod Kaniya, kung mao, ang mga nahisulod sa panon, nga walay lain kundili ang Iglesia Ni Cristo (Juan 10:7; 10:9 Revised English Bible; Buhat 20:28 Lamsa Translation).

Bisan pa niana, dili tin-aw alang sa uban ang gipasabot sa ulahing bahin sa sitas nga Juan 10:9— “…ug mosulod, ug mogula, ug makakaplag siya sa mga masibsib.” Aduna’y uban nga ang pagsabot niini anaa’y sagol nga pamilosopo: mao kunong gisulti nga “mosulod ug mogula ug makakaplag ug masibsib” tungod kay anaa sa sulod sa panon ang mga misulod kang Cristo ug kinahanglan igula aron mapasibsib, sama kuno sa ginabuhat sa literal nga panon sa karnero. Gisulti usab sa ubang mosaway sa Iglesia Ni Cristo: kung ang pagsulod nga gipasabot sa unang bahin sa sitas mao ang pagpa-miyembro sa Iglesia Ni Cristo, kung mao, ang paggula kuno nga gipasabot mao usab ang paggawas sa Iglesia Ni Cristo aron makakaplag ug masibsib. Ang konklusyon nila: ang mga misulod sa Iglesia Ni Cristo angay kuno nga mogawas niini aron maluwas.

Unsa ba ang kasaypanan sa ingon niini nga pagsabot? Mura na hinuon ug gisupak sa Ginoong Jesucristo sa Iyang mismong nahaunang gisulti. Sa usa ka bahin, giingon Niya nga ang mosulod Kaniya maluwas, sa laing bahin usab, palutawon sa uban nga giingon Niya nga kinahanglan mosulod ug pagkahuman mogula. Imposible! Si Cristo dili bisan kanus-a magsulti ug limbong o bakak (I Ped. 2:22). Wala usab Siya’y gitudlo nga angay mogawas sa Iglesia aron maluwas. Hinonoa, gisulti pa gani Niya nga ang mahimulag Kaniya o sa Iyang lawas o Iglesia (Col. 1:18) sama sa sanga nga mahimulag sa punuan—magamala, pagatigumon, ug igasugnod sa kalayo o sa silot nga walay katapusan (Juan 15:6; Apoc. 21:8).

Unsa, kung mao, ang gihatag sa Bibliya nga kahulugan sa ulahing bahin sa Juan 10:9? Sumala sa Ginoong Jesucristo, ang mga tawo nga misulod Kaniya nga gisaaran Niya nga maluwas adunay sudlan, ug paggawas nila didto, makakaplag sila ug masibsib.

Sa asa ba gitakda nga mosulod dili lamang ang mga misulod sa Iglesia Ni Cristo kondili ang tanang tawo? Sa Isaias 38:10 ingon niini ang giingon:

“Ako miingon sa kaudtohon sa akong mga adlaw, Ako mosulod sa mga ganghaan sa lubnganan: Ako gidid-an sa nahibilin sa akong mga tuig.” (King James Version, gihubad gikan sa Ingles)

Ang tanang tawo gitakda nga mosulod sa lubnganan o mamatay. Ug kung sa unsang paagi gitakda sa Dios sa tanang tawo ang kamatayon, “pagkahuman niini mao ang paghukom” (Heb. 9:27). Bisan pa niana, ang bintaha sa mga misulod kang Cristo o misulod sa Iyang Iglesia piho nga mogula sa lubnganan ug makakaplag sa mga masibsib tungod kay gipiho ni Cristo nga ang Iyang Iglesia dili mabuntog sa gahom sa kamatayon:

“Busa sultihan ko ikaw; ikaw si Pedro ug ibabaw niining bato tukoron ko ang akong iglesya, ug bisan gani ang kamatayon dili gayod makabuntog niini” (Mat. 16:18 Maayong Balita Biblia 1981)

Kini ang gipasabot sa gisulti sa Ginoong Jesucristo sa Juan 10:9. Ang mga misulod Kaniya o mga miyembro sa Iglesia Ni Cristo ang gisaaran Niya ug kaluwasan, bisan pa ug “mosulod” sila sa lubnganan, “mogula” ra gihapon sila didto o mabuhi pag-usab. Mahitabo kini sa Iyang Ikaduhang Pag-anhi:

“Kay ang mao nga Ginoo, sa usa ka pagsinggit, sa usa ka tingog sa punoan sa mga manolonda, ug sa budyong sa Dios, manaug gikan sa langit ug ang mga nangamatay diha kang Cristo mangabanhaw pag-una.” (I Tes. 4:16)

Ngano man usab nga gisulti nga ang anaa sa panon o Iglesia Ni Cristo nga mosulod ug mogula sa lubnganan “makakaplag sa mga masibsib”?

Aduna’y duha ka matang sa pagkabanhaw—ang una mao ang sa kinabuhing walay katapusan ug ang usa pa pa mao ang sa paghukom o walay katapusang silot: “…kay ang takna moabut nga ang tanan nga anaa sa mga lubnganan makadungog sa iyang tingog, ug managpanggula ang mga nanagbuhat sa maayo ngadto sa pagkabanhaw sa kinabuhi; ug ang mga nanagbuhat sa dautan ngadto sa pagkabanhaw sa paghukom” (Juan 5:28–29).

Ang mga iya ni Cristo ang kauban sa unang pagkabanhaw ug sila ang dad-on Niya aron magapuyo sa Balaang Siyudad, sa bag-ong langit ug yuta (I Tes. 4:16–17; Apoc. 21:1–4). Busa, sa pagkabanhaw, dili na sila gutomon, uhawon, o mamatay sanglit si Cristo, nga maoy pastor nila, ug magamando kanila sa mga tuburan sa tubig sa kinabuhi (Apoc. 7:16–17). Mao kini ang sibsibanan nga makaplagan nila sa Balaang Siyudad nga gisaad sa Dios sa Iyang mga pinili.

Busa, tin-aw nga sa Juan 10:9, gipahayag ang saad sa kaluwasan ni Cristo sa mga misulod Kaniya o nahimong miyembro sa Iglesia Ni Cristo. Mosulod sila ug mogula sa lubnganan—mamatay apan mabuhi pag-usab—ug mupuyo sa Balaang Siyudad diin makaplagan nila ang tubig sa kinabuhi—ang “sibsibanan nga malunhaw” (Salmo 23:2) nga ilang gihinam-hinam.