Itaguyor so maptek ya panagbilay
Itaguyor so maptek ya panagbilay
La Biblia enseña sobre una sola verdadera Iglesia y cuyo nombre es “Iglesia De Cristo,” que es profetizada, y cree que solamente el Padre es el Dios verdadero
Por ROMMEL V. SAN PEDRO
IPAPAKABAT NA BIBLIA so say duaran nandumaan ya klasi na too tan say nandumaan met ya pansumpalan da. Say sakey ya klasi et say maptek tan say sakey ni et say mauges:
“Sikato ya maptek ed kurang to et untatakot ed KATAWAN, balet sikato ya pikewet so saray dalan to et mangipupolisay ed Sikato.” (Prob. 14:2 impatalos ed Pangasinan manlapu ed New Pilipino Version)
“Say toon wala ed katunungan et makalmo na bilay, Balet say dalan na mauges et mamaarap ed ipapatey.” (Prob. 11:19 impatalos ed Pangasinan manlapu ed Magandang Balita Biblia)
Say manbibilay ya pikewet o mauges et mamaarap ed ipapatey o kisasagmak, bangbalet say toon manbibilay ed katunungan et makalmo na bilay.
Agtayo gabay so nisagmak, ingen pilalek tayo so makagamor na kilalaban tan bilay ya andi anggaan ed Agew na Panangukom. Kanyan,
itaguyor tayo so maptek ya panagbilay anggano patuloy ni ya unloloor tan unkakayat so kaugsan ed mundo. Panon tayo iyan nagawaan?
- Ibilay tayo so saray aral na Diyos ya ibabangat To ed panamegley na saray initdan To na kanepegan ya manbangat (II Juan 1:9; Juan 14:21 tan 23 mbbpan).
- Agtayo manggawa na antokaman ya mauges o sumlang ed saray aral na Diyos (Roma 6:1-2 tan 12-15 mbbpan).
- Anggano wala tayo ed kagipitan o kairapan et aleg tayon aligen so saray totoon manggagawa na mauges ya say irarason da et “say toon nagigipit, anggano ed kampit umpepeket.” Halimbawa, pian makaekal ed kairapan et mantakew o minonong ed illigal ya gawa (Isa. 55:7 mbbpan).
- Sikapen tayon manbilay ya onong ed linawa na Diyos ya walay panagpoger ed sarili (self-control) tan aga gawaen so antukaman ya gabayen anggano mauges. Aga met nepeg ya padalos-dalos ed panaggawa tan aga natatangguyor ed saray pikewet ya kagagawa (Tito 2:12).
- Manpikasi tayo ta pian unkerew na tulong na Diyos. Ed panamegley to met ya et naikukono tayo ed Sikato so saray plano tayo pian agtayo mankamali ed panagdesisyon (Mar.11:24; Sal. 145:18 mbbpan).
Nonoten tayo ya, “Akaimaton so KATAWAN ed amin ya pasen, Sikato et lanang ya akabantay ed mauuges tan matutunong ya too” (Prob. 15:3 impatalos ed Pangasinan manlapu ed npv). Kanyan, patuloy tayon gawaen so ibabangat na Biblia ya manbilay tayo unong ed saray aral na Diyos.
