GINAPAKILALA SANG BIBLIA ang duha ka magkalain nga sari sang tawo kag ang ila magkatuhay nga palaabuton. Ang isa ka sari amo ang nagalakat sang tadlong ukon ang matarong kag ang isa pa amo ang balingag ukon ang malaot:

“Ang nagalakat sa iya pagkatadlong nagakahadluk sa GINOO, apang ang balingag sa iya mga dalanon nagatamay sa iya.” (Hulubaton 14:2 Ang Biblia-Hiligaynon)

“Ang malig-on sa pagkamatarung mabuhi, apang ang nagasonod sang malaut mapatay.” (Hulubaton 11:19 abhil)

Ang nagapangabuhi sang binalingag ukon sang malaot padulong sa kamatayon, apang ang nagapangabuhi sang matadlong ukon sang matarong makaangkon sang kabuhi.

Indi naton gusto nga malaglag, kundi ang aton ginahandom amo ang makabaton sang kaluwasan kag sang kabuhi nga walay katapusan sa Adlaw sang Paghukom.

Gani, manindugan kita sa matarong nga sari sang pagpangabuhi bisan padayon nga nagalala kag nagalapnag ang kalautan sa kalibutan. Paano bala naton ina mahimo?

• Sundon naton ang mga kasuguan sang Dios nga ginatudlo Niya paagi sa mga ginhatagan Niya sang katungod sa pagpangwali (2 Juan 1:9; Juan 14:21 kag 23 abhil).
• Indi kita maghimo sang anuman nga kasal-anan ukon supak sa mga kasuguan sang Dios (Roma 6:1-2 kag 12-15 Maayong Balita-Hiligaynon).
• Bisan pa nga yara kita sa kabudlayan ukon sa kapigaduhon, indi naton pag-ilugon ang mga tawo nga nagahimo sang malain kag ang ginahatag nga rason amo nga “ang tawo nga yara sa kaimulon, nagapang-uyat bisan sa patalom.” Halimbawa, para lang makatibawas sa kapigaduhon, nagapangawat ukon kaupod sa nagahimo sang ilegal nga buluhaton (Isa. 55:7 mbbhil).
• Tinguhaon naton nga makapangabuhi sang suno sa kabubut-on sang Dios nga may pagpugong sang kaugalingon (self-control) kag indi nga ang pagahimuon amo ang kun ano lang ang naisipan niya nga himuon bisan nga malain. Indi man siya dapat nga padasudaso sa mga ginahimo kag indi siya nagapadaladala sa mga malaut nga buluhaton (Tito 2:12 mbbhil).
• Magpangamuyo kita para mangayo sang bulig sa Dios. Sa sini man nga paagi mahingyo naton sa Iya ang aton mga plano para indi kita magsala sa mga desisyon (Marcos 11:24; Salmo 145:18 mbbhil).

Dumdumon naton nga “Makita sang GINOO ang tanan, bisan sa diin nga lugar. Ginatan-aw niya ang mga ginahimo sang mga malaot kag sang mga matarong.” (Hulubaton 15:3 Ang Pulong sang Dios). Gani, padayon naton nga sundon ang ginatudlo sang Biblia nga magpangabuhi sang suno sa mga pulong sang Dios.