SAY SAKEY ED SARAY SITAS na Biblia ya mamapaneknek ya mabli tan kaukulan so iloloob ed Iglesia ta pian nagamoran so panangilaban na Katawan ya Jesucristo et say akasulat ed San Juan 10:9. Dia ed ununan pasen na sitas – ya diman et inkuan nen Cristo ya, “Siak so pinto: no wala’y onloob ed siak, sikato so nilaban” – et ibabaga so sipan To ya nilaban so saray limmoob ed Sikato, salanti, saray akaloob ed kasimpokokan, ya anggapoy arom no ag say Iglesia Nen Cristo (Juan 10:7; 10:9 Revised English Bible; Gaw. 20:28 Lamsa Translation).

Bangbalet, aga malinew ed arom so kabaliksan na onor ya pasen na sitas ya San Juan 10:9—“… tan sikato’y onloob tan onpaway naani, tan makaromog na panangipakanan.” Wala ray arom ya say panangipatalos da ed saya et walay laok ton pamimilosopo: kanyan imbaga kono ya “onloob tan onpaway, tan makaromog na panangipakanan” lapud wala ed loob na kulungan iray limmoob ed Cristo, kaukulan ya ipaway ira pian napakan, ya singa gagawaen ed literal ya polok na karnero. Ibabaga met na saray arom ya manederal ed Iglesia Nen Cristo: no say iloloob ya totokoyen ed unaan ya pasen na sitas et say pimomoyong ed Iglesia Nen Cristo, sirin, say ipapaway kuno ya totokoyen et say ipapaway met lamlamang ed Iglesia Nen Cristo pian makaromog na panangipakanan. Say konklusyon da: saray limmoob ed Iglesia Nen Cristo et nepeg ni kono ya umpaway dia pian nilaban.

Antoy lingo na onyan panangipatalos? Ompapaway ya susupyaten nen Cristo mismo so imbaga To. Ed sakey ya pasen ibabaga Ton say onloob ed Sikato et nilaban; ed sananey ya pasen balet et papawayen na arom ya ibabaga To ya kaukulan ya onloob tan kasumpal to et umpaway. Imposible! Aga gawaen nen Cristo kapiganman ya mansalita na katilaan (I Ped. 2:21). Anggapo met so imbangat To ya nepeg ya umpaway ed Iglesia Nen Cristo pian nilaban. Ingen, imbaga To ni ya say nasian ed Sikato o dia ed laman To o Iglesia (Col. 1:18) et singa sanga ya nisian ed sengeg—namagaan, tiponen, tan ibontok ed apoy o dia ed dusa ya andi anggaan (Juan 15:5; Apoc. 21:8).

Anto, sirin, so iiter na Biblia ya kabaliksan na onor ya pasen na Juan 10:9? Onong ed Katawan ya Jesucristo, saray totoon limmoob ed Sikato ya sinipanan To ya nilaban et walay looban da, tan kapaway da ed saman et makaromog iray panangipakanan.

Iner ta akagetar ya onloob aliwa labat ya saray akimoyong ed Iglesia Nen Cristo no ag ingen saray amin ya totoo? Dia ed Isaias 38:10 et onya so ibabaga:

“Inkuan ko ed kapultot na saray agew ko, Siak et onloob ed saray pinto na lobok: Siak et asibletan na saray nakekera ko ni iran taon.” (King James Version, impatalos manlapud Ingles)

Say amin ya too et akagetar ya onloob ed lobok o ompatey. Tan no panon ya ingetar na Dios ed totoo so ipapatey, “kayari saya ontombok so kaokom” (Heb. 9:27). Bangbalet, say bentaha na saray limmoob ed kinen Cristo o akimoyong ed Iglesia To et piho ya umpaway ira ed lobok tan makaromog ira na panangipakanan lapud piniho nen Cristo ya say Iglesia To et aga napanalungaringan na pakapanyari na ipapatey:

“Tan kuan ko met ed sika, sika et Pedro, tan diad tapew na sayan bato et ipaalagey koy iglesiak, tan ag taloen na anggan say pakayari na patey.” (Mat. 16:18 Magandang Balita Biblia, impatalos manlapud Tagalog)

Saya so kabaliksan na imbaga nen Katawan ya Jesucristo ed Juan 10:9. Saray limmoob ed Sikato o saray miembro na Iglesia Nen Cristo so sinipanan To na kilalaban, “onloob” man ira ed lobok et “umpaway” lamlamang ira diman o nabilay lamet. Nagawa ya ed mikadua Ton isasabi:

“Ta say Katawan a dili onlasor a manlapu ed tawen, pati sakey ya eyag, pati voces na arkanghel, tan say trompeta na Dios: et saray inaatey ed Cristo onbilay ira ya onona.” (I Tes. 4:16)

Akin met et imbaga ya saray wala ed polok o Iglesia Nen Cristo ya onloob tan umpaway ed lobok et “makaromog na panangipakanan”?

Walay duaran klasi na iyooli ed bilay – say unaan et para ed bilay ya andi anggaan tan say sakey ni et para ed pangokom o andi anggaan ya dusa: “…Ta onsabi horas, ya amin so saray wala ed saray lobok narengel da so voces to. Et onpaway ira; saray nangawa na maong, nipaakar ed kioli ed bilay; bang saray nangawa na mauges, dia met ed kioli ed bilay ed kaokom.” (Juan 5:28–29).

Saray kayaryan nen Cristo et kaiba ed ununan kioli ed bilay tan sikara so awiten To pian manayam ed Masantos a Ciudad, ed balon tawen tan dalin (I Tes. 4:16–17; Apoc. 21:1–4). Kanyan, dia ed kioli ed bilay et ag lara naerasan, naapgaan, o ompatey ni lapud si Cristo, ya mammaliw ya pastol da, et irawa To o pastolan To ira ed sobol na danum na bilay (Apoc. 7:16–17). Aya so panangipakanan ya naromogan da ed Masantos a Cuidad ya insipan na Dios ed saray lingkor To.

No ontan sirin, malinew ya dia ed Juan 10:9 et binitla so say sipan nen Cristo ya kilalaban ed saray limmoob ed Sikato o akimoyong ed Iglesia Nen Cristo. Onloob ira tan umpaway ed lobok—ompatey balet onoli ed bilay—tan manayam ed Masantos a Cuidad ya diman pastolan ira ed danum na bilay—say “malambot a pastolan” (Sal. 23:2) ya pipirawaten da.