Agraniag a kas silaw ti lubong

Agraniag a kas silaw ti lubong

Dagiti miembro iti Iglesia Ni Cristo ket agranraniyag a kas silaw iti lubong babaenbaeten iti panagtungpalda iti namnamaen namnamaen ni Apo Dios kadakuada

Por ROMMEL V. SAN PEDRO

(Naipatarus iti Ilocano ni ROD L. CABERTO)

Napateg unay ti pannakikamkameng iti Iglesia Ni Cristo. Kas kinuna ni Apo Jesucristo, “… siasinoman a sumrek iti uneg iti arban babaen kaniak ket maisalakanto” (Juan 10:9 Revised English Bible).

Ti arban ket ti Iglesia Ni Cristo (Acts 20:28 Lamsa Translation).

No kasta ngarud, ti Manangisalakan mismo ti mangbilin kadagiti tattao a sumrek iti Iglesiana tapno maisalakanda iti panangukom ti Dios (Roma 8:1; I Cor. 5:12–13).

Gapu iti daytoy a kinapateg ti Iglesia Ni Cristo, ibingay dagiti miembrona ti pammatida, a buyugen ti ayat ken panangimasakit, kadagiti saanpay a miembro tapno makitimpuyogda met iti Iglesia.

Tungpalenda daytoy a pagrebbenganda babaen iti napinget a panangawis kadagiti ipatpategda iti biag, gagayyem, ken kaam-ammoda a dumngeg iti panagadal ti Biblia; panangited kadagiti kopia ti magasin a Pasugo: God’s Message ken polieto; panangallukoy kadakuada a buyaen ken denggen dagiti programa ti Iglesia iti telebision ken radio, ken bisitaen dagiti official social media account ken website ti Iglesia—iglesianicristo.net, incmedia.org, ken pasugo.com.ph.

Babaen ti kastoy nga aramid, matungpalda ti panggep ti kina-Cristianoda—agserbi a kas silaw iti lubong.

Maiyannatup daytoy iti pagayatan ti Dios a makagteng ti amin a tattao iti pannakaammo ti kinapudno tapno maisalakanda inton Aldaw ti Panangukom (I Tim. 2:3–4).

Kalaktip ti panagpartisiparda iti pannakaisaknap ti ebanghelio, pudno nga agraniag a kas silaw ti lubong dagiti miembro ti Iglesia Ni Cristo babaen iti wagas ti panagbiagda.

Namnamaen ni Apo Dios nga awan pakapilawan ken pakababalawan ti panagtungpalda kadagiti sao wenno adal ti Dios a naisuro kadakuada.

Kas kinuna ni Apostol Pablo, “Tapno awan koma ti pakababalawanyo ken natarnawkayo, annak ti Dios nga awan pakapilawanna iti tengnga ti maysa a nakillo a kaputotan, nga iti tengngada agranyagkayo a kas silaw iti lubong a sititibker a mangsalimetmet iti sao ti biag, tapno agrag-oak iti aldaw ni Cristo ta diak nagtaray nga awan mamaayna wenno nagbannog nga awan mamaayna” (Filip. 2:15–16 naipatarus manipud iti New King James Version).

Isu a saan a makiraman dagiti pudno a miembro ti Iglesia Ni Cristo kadagiti aramid a maisupiat kadagiti adal ti Dios, uray pay no nagbalinen ti kasta nga aramid a pagalagadan dagiti tattao iti lubong.

Saanda nga ipalubos a maguyugoyda iti peer-pressurepanangpilit kadakuada dagiti gagayemda—nga agaramid kadagiti dakes a banbanag, kas iti panaginum ti arak, panagabuso ti droga, pre-marital sex, pannaki-live-in, homosexuality, manangallilaw a pagsapulan, panagsugal, ken nadumaduma pay, gapu ta patienda unay a dagita ti mamagpeggad ti namnama ken pribilehioda a magun-od iti pannakaisalakan (I Cor. 6:9–10).

Imbes nga anamonganda ti kultura ti lubong a nasipnget gapu kadagiti dakes nga aramid, tungpalen dagiti miembro ti Iglesia Ni Cristo ti insuro ni Apo Jesus, “Agraniag koma ti silawyo iti sangoanan dagiti tattao, tapno makitada dagiti naimbag nga aramidyo ket idaydayawda ni Amayo sadiay langit” (Mat. 5:16 naipatarus manipud iti NKJV).

Ti tudtuduenna a naimbag ket ti linteg wenno dagiti bilin ni Apo Dios a naisurat iti Biblia (Roma 7:12).

Kasano kadedikado iti panagtulnog iti linteg ti Dios ti ekspetarenna kadagiti pudno a Cristiano? Insuro ni Apostol Pablo:

“Masapul a saantayo a mabannog nga agaramid ti naimbag. Awatentayto ti apittayo a biag nga agnanayon iti umno a tiempo. Masapul a saantayo a sumuko.” (Gal. 6:9 naipatarus manipud iti Easy-to-Read Version)

Saan ngarud a nakaskasdaaw nga iti ania man a sitwasion, agtalinaed a dedikado dagiti miembro ti Iglesia Ni Cristo nga agtulnog kadagiti bilin ti Dios kas iti panagdar-ay iti panaggigimong (Heb. 10:25), panagdaton (Heb. 13:15–16), panagtulong kadagiti agkasapulan (Deut. 15:11), panangibingay ti pammatida kadagiti saan pay a miembro (Juan 4:28–30), ken panagbiag iti kinalinteg (Efe. 4:21–24).

Agyamanda met iti Dios iti amin a banag (I Tes. 5:18).

Isu nga iti pananglaglagip ti Iglesia ti maika-111 a tawenna idi Hulio 27, 2025, nagkaykaysa dagiti miembrona iti entero a lubong nagdaton ti naimpapusoan a panagyaman ken Apo Dios.

Saanda a mauma nga agtulnog kadagiti linteg ti Dios, uray adda parikut, agsipud ta babaen iti dayta ket pudno nga agserbida a kas silaw ti lubong.

Kas paneknekan ti Biblia, ti kanayon a panagaramid iti naimbag iti imatang ti Dios ket saan nga awan ti pakagunggonaan.

Uray no masapul nga agsakripisioda, saan a sumuko uray kaano dagiti miembro ti Iglesia Ni Cristo a mangtungpal kadagitoy a rebbengenda, gapu ta sinigurado ni Apo Dios ti karina nga inton dumteng ti naituding a panawen, awatendanto ti gunggona a biag nga agnanayon.