
Sunlag bilang sulu ning yatu
Sunlag bilang sulu ning yatu
SOBRANG ULAGA ING PAGLUB KING IGLESIA NI CRISTO (Church Of Christ). Anang Ginung Jesucristo, “…ninumang lungub king kawan king kapamilatan ku miligtas ya” (Juan 10:9 Revised English Bible). Ing Iglesia Ni Cristo ing kawan (Ding Dapat 20:28 Lamsa Translation). Anya, ing Talapagligtas mismu ing manutus kareng tau a lungub king Kayang Iglesia ban miligtas la king pamanukum ning Dios (Rom. 8:1; I Cor. 5:12–13).
Uli na ning maragul a ulaga ning Iglesia Ni Cristo, magpalaganap lang kasalpantayanan ring miyembru na kareng ali pa miyembru uli na ning lugud ampong malasakit ban lungub la rin king Iglesia.
Daptan de ing karelang katungkulan king kapamilatan ning pamag-agkat karelang pamilya, kaluguran, ampong kakilala kareng pamanigaral ning Biblia; didinan da lang kopya Pasugo: God’s Message magazine ampong pulyetu; agkat da lang manalbe ampong makiramdam kareng programang panrelihiun ning Iglesia king telebisyun ampong radyu, at agkat da lang puntalan deng opisyal a social media accounts ampong websites ning Iglesia – iglesianicristo.net, incmedia.org, ampong pasugo.com.ph.
E la petugut maski king panaun ning pandemya na atyu la mu king bale ring marakal karela. King kapamilatan na nini, adapat de ing karelang katungkulan bilang tune Cristianu – magsilbi lang sulu king yatu (Mat. 5:14). Makabate ya ini king kaburian ning Dios a abalu ning sablang tau ing katutuan ban miligtas la king aldo ning Pamanukum (I Tim. 2:3–4).
Kayabe ning pagsaup king pamagpalaganap ning kasalpantayanan, sukat lang sunlag bilang sulu ning yatu ring miyembru ning Iglesia Ni Cristo king kapamilatan ning paralan ning karelang pamibibie. Buri ning Ginung Dios a akit karela ing bieng malinis at alang dungis a pagdapat king amanu ning Dios o kareng aral a tinggap da. Anang Apostol Pablo, “ban maging malinis kayu at alang dungis, anak ning Dios a ganap king libutad da ring marawak at palpikasalang enerasyun, sunlag kayu karela bilang sulu ning yatu kabang ampanganan yu la king amanung babie bie, ban magmaragul ku king aldo nang Cristo uling e ya mesayang ing kanakung pulayi o obra” (Fil. 2:15–16 New King James Version).
Inya e la makiabe kareng dapat a e bate kareng amanu ning Dios ring miyembru ning Iglesia Ni Cristo maski sabian pang ita na ing normal para kareng tau king yatu. E de paburen ing peer-pressure a mag-impluwensiya karela a gawang marok, balamu pamaglasing o pamag-abusu king droga, premarital sex, pamag-live-in, homosexuality, obrang mamurayit aliwang tau, pamagsugal at aliwa pa uling matibe lang maniwala a malage ya peligru ing karelang kapanayan ampong karapatan king kaligtasan (I Cor. 6:9–10).
Daptan ning miyembru ning Iglesia Ni Cristo ing tuturu ning Ginung Jesucristo at ali ing kultura ning yatu a meging marok uli na ning kasalanan, “Makanyan ya namang sukat sunlag king arapan da ring tau ing sulu yu ban akit da ing dapat yung mayap, at paligayan de ing Ibpa yung atyu banua” (Mat. 5:16 NKJV). Ing batas o utus ning Ginung Dios a makasulat king Biblia ing dapat a mayap (Rom. 7:12).
Makananung karagul dedikasyun king pamaniapat ning Kayang batas ing pantunan na ning Dios kareng tune Cristianu? Tiru nang Apostol Pablo:
“E tamu sa sasawan ing pamaniapat mayap; mupul tamung bie alang angga paniatang na ning panaun a makatuldu. E tamu susuku.” (Gal. 6:9 Easy-to-Read Version)
Anya e makabigla na maski nanu ing sitwasyun, ing utus ning Dios ing pane dang dadaptan balamu ing pamaniamba (Heb. 10:25), mamie ain (Heb. 13:15–16), pagsaup kareng taung mangailangan (Deut. 15:11), pamagpalaganap kasalpantayanan kareng ali pa miyembru (Juan 4:28–30), at ing pamibibie king matulid a bie (Efe. 4:21–24). Magpasalamat la rin king Dios para king sablang bage (I Tes. 5:18). Anya, king pagganaka ning Iglesia king kayang 111 a banua king Hulyo 27, 2025, misasangmetung la ring miyembru king mabilug a yatu king pamag-ain sukat pasalamat king Ginung Dios. E la mipapagal king pamaniapat king batas ning Dios, maski ating pandemya, uling king pamaniapat na nini tutu lang magsilbing sulu ning yatu.
Patutuan ne ning Biblia na ating ablas ing alang patugut maniapat mayap king arap ning Dios. Maski magsakripisyu la, e la susuku ring miyembru ning Iglesia Ni Cristo king pamaniapat kareng obligasyun da, uling siniguru ne ning Ginung Dios na king panaun a makatuldu, tanggap lang bie alang angga.